Հունվարի 21-ին ՄԱԿ-ի Անվտանգության խորհրդի քննարկման թեման էր «Խաղաղաշինությունը հակամարտությունից հետո»։ Քննարկմանը մասնակցում էին Խորհրդի անդամ և ոչ անդամ երկրներ, որոնք շարունակական հետաքրքրություն են ցուցաբերում խաղաղաշինության ու վերականգնման դժվարին շրջանի գործընթացներին, քանի որ պատերազմի մեջ ներքաշված հասարակության համար էական նշանակություն ունի կարճաժամկետ կայունացումից անցումը երկարաժամկետ անվտանգության:
Թեմատիկ այս քննարկմանը մասնակցել է նաև ՄԱԿ-ում Հայաստանի դեսպան Կարեն Նազարյանը, որն իր ելույթում նշել է, որ խաղաղաշինության համար անհրաժեշտ գործընթացները քննարկելիս ու իրականացնելիս անհրաժեշտ է հաշվի առնել տվյալ իրավիճակի յուրահատկությունը, հակամարտության պատճառներն ու հետևանքները, որպեսզի առավել արդյունավետորեն իրականացվեն տուժած բնակչության կարիքների ապահովմանն ուղղված անհրաժեշտ ծրագրերը:
Այս համատեքստում մասնավորապես կարևորվել է հիմնական դերակատարների, այդ թվում՝ պետությունների, տարածաշրջանային միջկառավարական կառույցների, միջազգային ֆինանսական հաստատությունների ու հասարակական կազմակերպությունների համակարգված դերակատարումն ու համագործակցությունը` խաղաղության ու կայուն զարգացմանն ուղղված վերինտեգրման ու վերակառուցման ջանքերը հաջողությամբ իրականացնելու համար:
