Վրաստանը չի հրաժարվում եւ չի հրաժարվի Ռուսաստանի հետ բանակցություններից, այս մասին Время новостей-ին հայտնել է Վրաստանի արտգործնախարար Գրիգոլ Վաշաձեն: «Մեջբերեմ նախագահ Սահակաշվիլիին, ով բազմիցս հայտարարել է, որ մենք պատրաստ ենք Մոսկվայի հետ բանակցությունների` առանց նախապայմանների, ցանկացած պահի, ցանկացած վայրում: Մենք ակնկալում ենք կառուցողական պատրատակամություն` լուծելու խնդիրները»,- նշել է Վրաստանի ԱԳ նախարարը: Սակայն նա միաժամանակ նկատել է, թե պետք չէ հույս ունենալ, որ բանակցություններում Վրաստանը պետք է քննարկի առեւտրա-տնտեսական հարցեր կամ հանքային ջրերի` ռուսական շուկա վերադարձի կամ գյուղատնտեսական հարցեր: «Բանակցությունները պետք է ընթանան Վրաստանից ռուսական զորքերի դուրս բերման , մեր երկրի տարածքային ամբողջականության վերականգնման, եւ փախստականների` իրենց բնակավայրերը կամավոր վերադառնալու շուրջ: Ռուսաստանի հետ հարաբերությունները կարող են կարգավորվել միայն այս հիմքով: Մենք գիտակցում ենք, որ այդ բանակցություններում պետք է հաշվի առնել նաեւ Ռուսաստանի շահերը»: Վաշաձեն հայտնել է նաեւ, որ Վրաստանի առաջարկին Մոսկվան չի պատասխանել. «Մոսկվան չունի մտածված ռազմավարություն Հարավային Կովկասի համար` ամբողջությամբ եւ Վրաստանի համար` մասնավորապես, Ռուսաստանը գնում է իրադարձությունների հետեւից»,- նկատել է Վրաստանի ԱԳ նախարարը: