Ռուսական ռադարները կարող էին բարելավել հակահրթիռային պաշտպանության ամերիկյան համակարգի հնարավորությունները: Սենատի հատկացումների հանձնաժողովում լսումների ժամանակ նման կարծիք է այսօր հայտնել Պենտագոնի հակահրթիռային պաշտպանության գործակալության ղեկավար, գեներալ-լեյտենանտ Պատրիկ Օ’Ռայլին:
Սենատորները հետաքրքրվել են, թե արդյո՞ք Ռուսաստանն ունի ինչ-որ տեխնոլոգիա և տեխնիկական միջոցներ, որոնցով կկարողանար կիսվել ԱՄՆ-ի հետ, որպեսզի «պաշտպանենք մեր Հայրենիքը կամ դաշնակիցներին»:
«Նրանք (Ռուսաստան) ունեն տեխնիկական միջոցներ, որոնք կարող էին մեզ համար օգտակար լինել»,- նշել է Օ’Ռայլին, ապա շարունակել. «Առաջին հերթին դրանք մեծ ռադարներ են, որոնք նրանք օգտագործում են իրենց պաշտպանության համար: Բացի այդ, Ռուսաստանի աշխարհագրական դիրքը, որը թույլ է տալիս դիտել ողջ Ասիան, ներառյալ՝ Հյուսիսարևելյան Ասիան, մեզ հնարավորություն կտար ֆիքսել հրթիռային սպառնալիքները թռիչքի վաղ փուլում… Նրանք նաև հնարավորություն ունեն այլ երկրների հրթիռային փորձարկումները դիտարկել, ինչը մեզ համար թանկարժեք տեղեկություն կլիներ»:
Գեներալ-լեյտենանտի խոսքերով՝ Վաշինգտոնը հետաքրքրված է հակահրթիռային պաշտպանության բնագավառում Ռուսաստանի հետ համագործակցությամբ: