Ինչպես տեղեկացրել էինք, 2010 թ., նախորդ տարվա արձանագրված ցուցանիշի համեմատ, ծնելիությունը աճել է 1.0 պրոմիլային կետով: Ծնելիության մակարդակի փոփոխությունն իր ազդեցությունն է թողել նաև կանանց ծնելիության տարիքային գործակիցների վրա ինչպես տարիքային առանձին խմբերում, այնպես էլ ամբողջապես վերցված ծնունակ տարիքում: Հատկանշական է, որ 20-24 տարեկանները և, որոշակիորեն ավելի պակաս չափով, 25-29 տարեկանները եղել, և շարունակում են հանդիսանալ ՀՀ առավել պտղաբեր տարիքային խմբերը, որոնց բաժին է ընկել ծնվածների՝ համապատասխանաբար 44.3%- ը և 30.7%-ը: Ծնելիության գումարային գործակիցը (երեխաների այն քանակը, որ կծնի կինն իր պտղաբերության ողջ շրջանում) կազմել է 1.551 երեխա՝ բնակչության պարզ վերարտադրության համար անհրաժեշտ 2.15 երեխայի դիմաց: Ընդ որում, 2010 թ. հունվարի 1-ի դրությամբ, քաղաքային բնակչության ծնելիության գումարային գործակիցը կազմել է 1.544, իսկ գյուղականինը՝ 1.538 երեխա: Մոր միջին տարիքը երեխայի ծննդյան ժամանակ, 2010 թ. հունվարի 1-ի դրությամբ, կազմել է 24.7, իսկ առաջին երեխայի ծննդյան ժամանակ` 23.0 տարեկանը: Հարկ է նշել, որ, 2010 թ. հունվարի 1-ի դրությամբ, ըստ ծննդի հաջորդականության` երրորդ և հաջորդող կարգի ծնունդների մասնաբաժինը կազմել է կենդանածինների ընդամենը 14.7%-ը, քաղաքներում` 12.1% և գյուղական վայրերում`19.2 %: