Նիգերիայում ԱՄՆ-ի դեսպանատունը էլեկտրոնային կայքի օգնությամբ իր համաքաղաքացիների համար հաղորդագրություն է տարածել: Ամերիկյան դիվանագիտական կազակերպության տվյալներով՝ իսլամական ուղղություն ունեցող տեղական ահաբեկչական «Բոկո Հարամ» խմբավորումը ծրագրավորում է մի շարք հարձակումներ իրականացնել մայրաքաղաք Աբուջայում:
Դեսպանատանը նշել են, որ կայանալիք հարձակումների մասին ոչ մի մանրամասն չունեն, բայց հայտարարել են, որ արդեն զգուշացրել են Նիգերիայի իշխանություններին հավանական հարձակման մասին:
Դիվանագետները խորհուրդ են տվել կրկնակի զգույշ լինել ահաբեկչության հավանական վայրերում, ինչպիսք են պետական շենքերը, դիվանագիտական առաքելության վայրերը, հյուրանոցները, շուկաները և առևտրի կենտրոնները:
Վերջին տարվա ընթացքում «Բոկո Հարամ»-ի գրոհայինները Նիգերիայում իրականացրել են տասնյակ ահաբեկչություններ, որոնց հետևանքով մահացել են հարյուրավոր մարդիկ:
