ԱՄՆ-ում երկու չինացի ուսանողների սպանողին որսալու համար 200 հազար դոլար պարգևատրում է նշանակվել: Այս մասին հաղորդում է Agence France-Presse-ը:
Ապրիլի 17-ին 75 հազար դոլարի չափով պարգևատրում է խոստացել Լոս Անջելեսի ղեկավարությունը, որտեղ էլ հենց իրականացվել է հանցագործությունը: Անցած շաբաթ 125 հազար դոլար է խոստացել քաղաքի ոստիկանությունը և Հարավային Կալիֆոռնիայի համալսարանը, որտեղ սովորել են ուսանողները:
23-ամյա Մին Ցյուին և Ին Բուն, որոնք ԱՄՆ-ում էլեկտրոտեխնիկա են ուսումնասիրել, սպանվել են ապրիլի 11-ին: Նրանց գնդակահարել են, երբ նրանք նստած են եղել ավտոմեքենայի մեջ: Ինչպես հաղորդում է Los Angeles Times-ը` սպանությունը տեղի է ունեցել համալսարանի հարևանությամբ:
Հանցագործության հիմքերը հայտնի չեն: Ոստիկանությունը կարծում է, որ ուսանողների վրա հարձակվել են մեքենան առևանգելու կամ թալանի նպատակով, որովհետև նրանց մոտից մի քանի իր է կորել: Ականատեսը վկայել է, որ դեպքի վայրից մուգ հագուստով մի մարդ է փախել:
