ИТАР-ТАСС-ի փոխանցմամբ՝ Աբխազիայի արտգործնախարար Վյաչեսլավ Չիրիկբան Մոսկվայում տեղի ունեցած մամուլի ասուլիսի ժամանակ հայտարարել է, որ շանտաժ ու սպառնալիքներ են կիրառվում այն երկրների նկատմամբ, որոնք պատրաստվում են ճանաչել Աբխազիայի անկախությունը.
«Այն երկրները, որոնք իրենց դոկտրինով ժողովրդավարական առաջընթաց են գրանցել, խաչակրաց արշավանք են հայտարարել ընդդեմ Աբխազիայի ու Հարավային Օսիայի՝ միջազգային մեկուսացումից դուրս գալու: Այդ երկրները դիմում են շանտաժի և սպառնալիքների, ինչն անգամ արվում է ԱՄՆ պետքարտուղարի մակարդակով:
Գոյություն ունի ԱՄՆ պետքարտուղար Հիլարի Քլինթոնի՝ բաց սպառնալիքներով (մասնավորապես՝ ֆինանսական պատժամիջոցներով) լի նամակը, որում նա սպառնում է մեզ ճանաչելու մտադրություն ունեցող երկրներին: Ժնևյան բանակցությունները հայտնվել են փակուղում, սակայն պետք է շարունակել դրանք: Կողմերը դեռ բավականաչափ հեռու են միմյանցից, որպեսզի գտնեն որևէ միջին դաշտ»:
Հիշեցնենք, որ Ժնևյան բանակցությունների հերթական փուլը տեղի է ունենալու հունիսի 7-8-ը։