ԱՄՆ իշխանությունները 25 մլն դոլար են հատկացրել Սիրիային՝ որպես մարդասիրական օգնություն, ընդ որում, այդ գումարից 8.5 մլն-ը կտրամադրվի սիրիացի փախստականներին:
ԱՄՆ պետքարտուղարության տվյալներով՝ գումարները կուղարկվեն միջազգային և ոչ կառավարական մարդասիրական կազմակերպությունների միջոցով:
Բացի այդ, ինչպես հաղորդում է Rosbalt գործակալությունը, ԱՄՆ-ը ավելացնում է ընդդիմությանը տրմադրվող օգնության չափը: Մասնավորապես հաղորդվում է, որ ընդդիմությանը կտրամադրվեն կապի միջոցներ և դեղորայք:
Ընդ որում, Վաշինգտոնում նշում են, որ նման համագործակցություն իրականացվում է միայն քաղաքական ընդդիմության հետ, որը բռնություն չի կիրառում, և ոչ թե Դամասկոսում իշխանություններին դիմակայող զինյալների:
Ավելի վաղ հաղորդվում էր, որ ԱՄՆ-ը պատրաստվում է առավելագույն խիստ պատժամիջոցներ սահմանել Սիրիայի վարչակարգի դեմ:
«Որքան կոշտ լինեն պատժամիջոցները, այնքան լավ: Մենք միշտ ասել ենք, որ ցանկանում ենք խստացնել պատժամիջոցները, ուժեղացնել քաղաքական և տնտեսական ճնշումները Բաշար Ալ-Ասադի և նրա վարչակարգի վրա: Մենք ցանկանում ենք, որպեսզի Ասադին հասկանալի կերպով ասվի, որ իրավիճակը փոխվել է, և նա պետք է վերլուծի եղած տարբերակները»,- հայտարարել է ԱՄՆ պետքարտուղարության պաշտոնական ներկայացուցիչ Մարկ Թոները: