ԱՄՆ նախագահ Բարաք Օբաման կոչ է արել Կոնգրեսին մի շարք միջոցներ ձեռնարկել՝ ուղղված վառելիքի շուկայում չարաշահումերի դեմ պայքարին:
Ինչպես հաղորդում է Agence France-Presse-ը, Օբամայի կողմից ներկայացված ծրագիրը նախատեսում է ավելացնել ապրանքայն ֆյուչերսների հարցերով հանձնաժողովում նավթի ֆյուչերսների գործարքներին հետևող աշխատակիցների հաստիքները: Բացի այդ, Օբաման առաջարկում է ավելացնել տուգանքը վառելիքի շուկայում չարաշահումների համար մինչև 10 մլն դոլար:
Ընդ որում, Օբաման խոստովանել է, որ «այդ քայլերից ոչ մեկն ինքնին չի հանգեցնի վաղն առավոտյան նավթի գնի նվազմանը»: «Սակայն այդ միջոցառումները կկանխեն շուկայում չարաշահումները և կհաստատեն, որ մենք հոգ ենք տանում ամերիկացի սպառողների շահերի մասին»,- ասել է նա:
Օբամայի քաղաքական մրցակիցները բազմիցս քննադատության են ենթարկել Օբամայի վարչակազմը ամերիկյան շուկայում վառելիքի բարձր գների համար: Մասնավորապես, իր նախընտրական քարոզարշավում այդ հարցը բարձրացնում է նրա հիմնական մրցակից Միթ Ռոմնին:
Հանրապետական կուսակցության առաջնորդներն ԱՄՆ Կոնգրեսի երկու պալատներում արդեն հասցրել են բացասական գնահատական տալ Օբամայի ծրագրին: Այսպես՝ Սենատում հանրապետական փոքրամասնության առաջնորդ Միտչ ՄաքՔոնելը հայտարարել է, որ Օբամայի ծրագիրը միայն մեկ նպատակ ունի՝ բարձրացնել սեփական հեղինակությունը: «Լցակայաններում բենզինի գնի իջեցման այն չի հանգեցնի»,- ասել է նա:
Կոնգրեսի Ներկայացուցիչների պալատի խոսնակ, հանրապետական Ջոն Բեյներն իր հերթին Օբամայի ծրագիրն անվանել է «քաղաքական հնարք»: Նրա կարծիքով, նախագահն արդեն ունի անհրաժեշտ ուժերը և բոլոր միջոցները վառելիքի շուկայում չարաշահումների դեմ պայքարելու համար: «Այդ դեպքում ինչո՞ւ, նման քաղաքական հնարքի փոխարեն, նա իր վարչակազմին չի պատվիրում լուծել այդ խնդիրը»,- ասել է Բեյները:
