«Առաջին լրատվականի» տեղեկություններով, հունվարի 7-ին Վանաձորում նորածին երեխային խեղդամահ արած կինը բուժվում է քաղաքի թիվ մեկ հիվանդանոցային համալիրում: Հիշեցնենք, որ Սուրբ Ծննդյան տոնից ընդամենը մեկ օր անց, հինգ երեխաների մայր տիկին Զ-ն լոգարանում ունեցել էր 6-րդ երեխային ու պոլիէթելինային տոպրակով խեղդամահ արել: Հետաքրքիր է, որ դեպքի մասին Վանաձորում իմացել են ընդամենը 10 օր հետո: Պատճառն էլ այն է եղել, որ ծննդկանը արյունահոսել ու ստիպված էին հիվանդանոց տանել: Փաստի առթիվով Լոռու մարզի քննչական բաժնում հարուցվել է քրեական գործ ՀՀ քրեական օրենսգրքի 106 հոդվածի (Մոր կողմից ծննդաբերության ժամանակ կամ դրանից անմիջապես հետո, ինչպես նաև հոգեճնշող վիճակում կամ մեղսունակությունը չբացառող հոգեկան խանգարման վիճակում նորածին երեխայի սպանությունը պատժվում է ազատազրկմամբ` առավելագույնը հինգ տարի ժամկետով) հատկանիշներով: Քաղաքում շրջանառվող լուրերի համաձայն` տիկնոջ ընտանիքում անընդհատ վեճեր են եղել, ու վանաձորցիները չեն բացառում, որ բազմազավակ մայրը այդ քայլին գնացել է սկեսուրի հորդորով: 45-ամյա տիկին Զ-ն թոռներ ունի, իր աղջիկներից մեկը պիտի ծննդաբերի շուտով ու մեկ այլ վարկածի համաձայն, մայրը ամաչել է հենց դրանից ու սպանել նորածնին: Պատմում են նաև, որ այդ կինը իր նախորդ երեխային ևս լոգարանում է ծննդաբերել: Իրավապահները դեռ ոչինչ չեն ասում, կատարվում է նախաքննություն: Նշենք, որ երեխայի մարմինը ոստիկանները գտել են բնակարանում, որից հետո տարել են ծննդատուն: այստեղից էլ երեխայի դին ուղարկվել է դիահերձարան: Դատաբժշկական փորձաքննությունը դեռ պետք է պարզի` երեխան մահացած չի ծնվել արդյոք: Մեր ունեցած տեղեկություններով, տիկին Զ-ի ընտանիքը սոցիալապես անապահով պայմաններում չի ապրում: Տան անդամները աշխատում են, նույնիսկ ավտոմեքենա ունեն:
