Հայաստանյան բլոգոսֆերայի առաջացումը թեև երկար պատմություն չունի, սակայն այս ոլորտի հայաստանյան մասնագետները վստահեցնում են, որ վերջին 2 տարիների ընթացքում բլոգները սկսել են բավական մեծ հաջողություն վայելել:
Բլոգն անհատի դրսևորումն է ինտերնետային որոշակի տիրույթում: Բլոգներն ամբողջ աշխարհում պարունակում են հսկայական ինֆորմացիա՝ բոլոր ոլորտներից: Արևմտյան երկրներում մարդն իր մասին պատմելու փոխարեն տալիս է սեփական բլոգի հասցեն, որտեղ ներառված են նրա քաղաքական հայացքները, անձնական մոտեցումներն այս կամ այն խնդրին:
Ընդհանրապես Հայաստանում բլոգինգի ձևավորման մասին խոսվում է վերջին 3-4 տարիներին, իսկ բլոգոսֆերայի դերը Հայաստանում նշանավորվեց 2008-ի նախագահական ընտրություններից հետո հայտարարված արտակարգ իրավիճակի ժամանակ, երբ ինֆորմացիայի հիմնական աղբյուրը բլոգներն էին: Այսօր արդեն Հայաստանում կան մոտավորապես 3000-4000 բլոգներ, որոնցից 500-ն ակտիվ են: Իսկ վերջին 1 տարվա ընթացքում Հայաստանում ավելացան արվեստի, երիտասարդության, շոու բիզնեսի թեմատիկայով բլոգների թվաքանակը։ Բլոգոսֆերայի հայաստանյան սակավ մասնագետները փաստում են, որ Հայաստանում սկսել է ձևավորվել կորպորատիվ բլոգների կուլտուրան և ակտիվանալ ինֆորմացիոնը: Իսկ ամենակարևորն առայժմ այն է, որ եթե նախկինում բլոգներում գրում էին հիմնականում լրագրողները, հասարակական, քաղաքական կյանքում ակտիվ մարդիկ, ապա վերջին մեկ տարում նկատվում է տարբեր տարիքի ու մասնագիտության բլոգերների թվի աճ: