Բունդեսվերը սկսել է ստուգումներ անցկացնել զինվորի գործի վերաբերյալ, ով սպառնացել է դերասան Ուիլսոն Գոնսալես Օքսենկնեխտին պատերազմի մասին ֆիլմում դերակատարման համար: Այս մասին տեղեկացնում է n-tv.de կայքը:
Զինվորը Լեբախում ծառայում է օդային դեսանտային զորքերում: Հարցաքննության ժամանակ նա խոստովանել է, որ դերասանին սոցիալական կայքի միջոցով սպառնալից նամակ է ուղարկել: Զինծառայողն իր այս քայլը մեկնաբանել է` ասելով, որ իրեն դուր չի եկել «Բարի գալուստ պատերազմ» ֆիլմում Օքսենկնեխտի մարմնավորած կերպարը: Դիտելով մի քանի սերիաներ` նա գրել է դերասանին. «Տղամա՛րդ եղիր և արի՛ 261-րդ օդային դեսանտային զորքերի գումարտակ: Ես քեզ կսպանեմ»։
Բունդեսվերի ներկայացուցչի խոսքերով` այժմ զինվորն ընդունել է իր մեղքը և պատրաստվում է գրավոր ներողություն խնդրել դերասանից։ Նա ասել է, որ ցանկացել է ջնջել նամակը, սակայն չի կարողացել անել դա՝ տեխնիկական պատճառներով:
«Բարի գալուստ պատերազմ» կատակերգական ֆիլմը սկսել է ցուցադրվել ապրիլի 9-ից՝ ProSieben հեռուստաալիքով: Ֆիլմի ստեղծողները նախագիծը ներկայացնում են որպես «հակապատերազմական կոմեդիա»՝ Աֆղանստանում գերմանացի զինվորների ծառայության մասին: Զինվորներին դուր չի եկել իրենց գործունեության նման մեկնաբանումը։
