«Մենք ենք այս քաղաքի տերը» քաղաքացիական նախաձեռնության սեփական ռեսուրսներով արված վիճակագրության համաձայն` մայրաքաղաքի տարածքում 2010 թ.-ին հատվել և ոչնչացվել է 164-ից ավելի ծառ: Երևանի կանաչ տարածքների մահվան վկայականում հայտնված ծառերը հերթական շինարարությունների հետևանքն են: Նախաձեռնության տվյալներով` արդեն մոտ 50 ծառ ոչնչացվել է Դուրյան թաղամասին հարող տարածքում¸ Կոմիտաս 60 հասցեում 21 ծառ-ի փոխարեն կառուցվել է բենզալցակայան¸ Ազատության պողոտային հարող տարածքում այրվել է 5000 քմ. խոտ և 30 ծառ¸ Վիշապների պուրակում 6-10 ծառ է հատվել, չորացվել և այրվել¸ Քանաքեռ-Զեյթուն վարչական շրջանի Սարկավագի 72 շենքի բակում ապօրինաբար հատել են պտղատու ծառերից կազմված փոքրիկ այգին: Կոմիտասի անվան այգու մի ողջ տարածք ծառահատվել է և տրվել կառուցապատման` դելֆինարիում կառուցելու համար: Ուսանողական այգում իրականացվել է ծառահատում՝ սրճարանառեստորանային համալիրի համար` մոտ 30 ծառ: Բուլդոզերներով ծառեր են արմատախիլ արվել Պարույր Սևակի և Ուլնեցու փողոցների խաչմերուկում գտնվող ավտոմեքենաների լվացման կետի հետնամասում: Բնակիչներից ստացված թարմ տեղեկությունների համաձայն՝ տարածքն ամբողջությամբ քարով պարսպապատել են և տարածքում պատրաստվում են սրճարան կառուցել: Ծառերի փոխարեն այս անգամ ուզում էին էլեկտրակայան կառուցել Կոմիտասի 5ա-ում¸ ինչի արդյունքում տարածքում վնասվել է մի քանի ծառ, սակայն բնակիչների բարձրացրած աղմուկի և հանրության արագ արձագանքի շնորհիվ ապօրինի ծրագիրը հաջողվել է դադարեցնել: «Մենք ենք այս քաղաքի տերը» քաղաքացիական նախաձեռնությունը արձանագրել է 2 ծառի չորացման դեպք նաև Երիտասարդական մետրոյի հարևանությամբ¸ ինչը նրանց նախաձեռնության բնորոշմամբ` արվել է ծառերի արմատներին ժավել լցնելով: