Հայռուսգազարդի Սյունիքի ԳԳՄ-ն 12500 բաժանորդ ունի: Ոչ մի բաժանորդ չի հրաժարվել սպասարկումից, սակայն կան փակ դռներ: «Այսինքն մարդիկ այստեղ չեն, ու գազաֆիկացված է բնակարանը, բայց բնականաբար մուծումներ չեն անում»,-ասում է մասնաճյուղի տնօրեն Արթուր Խաչատրյանը: Վերջինիս խոսքով, տաք ձմեռը նպաստել է օգտագործվող գազի ծավալների կրճատմանը: Այսպես, միայն դեկտեմբերին մեկ բնակչի հաշվով 30տոկոս գազ ավելի քիչ է ծախսվել, քան 2009թ-ի նույն ամսին: Պաշտոնյան հերքեց Սյունիքում տարածված այն խոսակցություններ, որ դիտավորյալ գազատար խողովակաշարով օդ են մղում կամ մաքուր գազ չեն մատակարարում, որպեսզի հաշվիչների ցուցիչները արագ պտտվեն: «Դա կբերի պայթյունների, նման բան հնարավոր չէ»,- ասաց Ա. Խաչատրյանը: Ինչ վերաբերում է գազաֆիկացման ծրագրերին, ապա դրանք օրակարգում են: Մեղրեցիներն ու ագարակցիները միշտ դժգոհում են, որ Հայաստան-Իրան գազատարը իրենց «քթի տակով է անցնում, բայց իրենք բնական գազ չունեն»: Մեր այս դիտարկմանը Ա. Խաչատրյանը ասաց, որ արդեն Մեղրիի ու Ագարակ քաղաքների համար տեխպայմանագրերը տրվել են, նախագծերը կազմվում են: Բայց նա պաշտոնապես հայտարարեց, որ Մեղրիի տարածաշրջանի բնակիչները հույս չունենան, թե Հայռուսգազարդը ֆինանսավորելու է: «Ընկերությունը հաստատ այդտեղ փող չի դնի: Շահավետ չէ: Մեղրիում, օրինակ 1000 բաժանորդ է, իսկ այդքան քիչ սպառողների դեպքում փող դնել նպատակահարմար չէ»,-ասաց Ա. Խաչատրյանը: Սակայն տնօրենը հույսը չի կորցնում ու համոզված է, որ պետբյուջեից, վարկային այլ ծրագրերով ելքը կգտնվի ու մեղրեցիները այս տարի բնական գազ կվայելեն: