Կատարում տապալվել է ռազմական հեղաշրջման փորձը:
Ավելի վաղ իրանական ԶԼՄ-ները հաղորդում էին, որ Կատարի բանակի և էմիրի գվարդիայի միջև տեղի ունեցած ուժեղ զինված բախման արդյունքում իշխանությունն անցել է երկրի զինված ուժերի բարձր սպայական կազմի 30 զինվորականների: Իսկ Կատարի էմիր շեյխ Համադ բեն Խալիֆա Թանին կնոջ հետ ամերիկյան ուղղաթիռով դուրս է հանվել պալատից և տարվել անհայտ ուղղությամբ:
Այժմ իրանական Press TV հեռուստաալիքը և մի շարք արաբական ԶԼՄ-ներ հայտնում են, որ հեղաշրջման փորձն այնուամենայնիվ տապալվել է: Հայտնի է, որ առաջինն ապստամբություն է բարձրացել էմիրի գվարդիան, որը փորձել է գրավել էմիր Համադ բեն Խալիֆա Ալ-Թանիի պալատը: Սակայն պետության ղեկավարին օգնության են հասել ամերիկյան հատուկջոկատայինները, որոնք դաժան մարտի մեջ են մտել ապստամբների հետ,- հաղորդում է եգիպտական Al-Bashair թերթը:
Ըստ որոշ տեղեկությունների՝ ապստամբ գվարդիականների կողմն է անցել երկրի զինված ուժերի գլխավոր շտաբի պետ գեներալ Համադ բեն Ալի Ալ-Ատիյյան, և բանակում նույնպես հուզումներ են սկսվել:
Նշենք, որ վերջերս մամուլում հաճախակի են դարձել Կատարում հեղաշրջումների և Կատարի էմիրի սպանության մասին տեղեկությունները:
Կատարի էմիրը երկիրը կառավարում է 1995 թվից, երբ հեղաշրջման արդյունքում նա տապալեց հոր իշխանությունը:
Այսօրվա հեղաշրջման փորձի վերաբերյալ պաշտոնական հայտարարություններ առայժմ չեն արվել: Որոշ հետազոտողներ արդեն դրա մեջ մեղադրում են Սիրիային: Նրանց կարծիքով՝ նման ձևով Սիրիայի նախագահ Բաշար Ալ-Ասադը փորձում է վրտեժ լուծել Կատարի կառավարությունից Դամասկոսի նկատմամբ թշնամական վերաբերմունքի համար:
