Ըստ Associated Press գործակալության` Իրանի միջուկային ծրագրի շուրջ բանակցություններն ավարտվել են առանց որևէ արդյունքի: Ինչպես հայտարարել է Եվրամիության արտաքին գործերի և անվտանգության քաղաքականության հարցերով գերագույն ներկայացուցիչ Քեթրին Էշթոնը, կողմերը չեն կարողացել նույնիսկ համաձայնության գալ բանակցությունների հաջորդ փուլի վերաբերյալ:
Նա նշել է, որ շաբաթ օրը բանակցությունները տապալվել են, քանի որ Իրանը պնդել է, որ անհրաժեշտ է վերացնել ՄԱԿ-ի պատժամիջոցները: Իրանը նաև ցանկացել է, որպեսզի «Վեցյակը» ճանաչի այդ երկրի ուրանի հարստացումն իրականացնելու Իսլամական Հանրապետության իրավունքը:
Էշթոնը նշել է, որ այս նախապայմաններն անընդունելի են «Վեցյակի» երկրների համար:
Հիշեցնենք, որ Ստամբուլում երկու օր շարունակ ընթանում էին Իրանի միջուկային ծրագրի շուրջ բանակցություններ, որին մասնակցում էին Իրանը և «Վեցյակի» երկրները` Մեծ Բրիտանիան, Միացյալ Նահանգները, Չինաստանը, Գերմանիան, Ֆրանսիան և Ռուսաստանը: Հանդիպումը նախագահել է Եվրամիության արտաքին գերատեսչության ղեկավար Քեթրին Էշթոնը:
