Պենտագոնն անցկացնում է ներքին հետաքննություն` կապված առնվազն հինգ զինծառայողների հետ, ովքեր ուղեկցել են ԱՄՆ նախագահ Բարաք Օբամայի պատվիրակությանը Կոլումբիայում տեղի ունեցած Համաամերիկյան գագաթնաժողովի ժամանակ:
Ամերիկյան ԶԼՄ-ների տեղեկատվության համաձայն` անցած շաբաթ Գաղտնի ծառայության 11 ամերիկացի գործակալներ, ովքեր պետք է ապահովեին Օբամայի անվտանգությունը Կոլումբիայում, և 5 զինծառայողներ հեռացվել են իրենց պարտականությունների կատարումից և վերադարձվել են հայրենիք՝ «ոչ պատշաճ վարքի համար»:
ԶԼՄ-ները ենթադրում են, որ խոսքը գործակալների և զինծառայողների՝ մարմնավաճառների հետ ունեցած կապի մասին է: Հատուկ ծառայության ներկայացուցիչ Էդ Դոնովան չի հաստատել այս տեղեկատվությունը:
Երկուշաբթի օրը Պենտագոնի ներկայացուցիչ Ջորջ Լիթլը լրագրողներին հայտնել է, որ Պենտագոնն անցկացնում է սեփական հետաքննությունը: Լիթլն, այնուամենայնիվ, խուսափել է պատասխանել լրագրողների այն հարցին, թե Պենտագոնի քանի ծառայող է ներգրավված սկանդալի մեջ:
«Կարող եմ միայն ասել, որ այդ զինծառայողներն օգնել են Գաղնտի ծառայությանը` այցը կազմակերպելու համար»,- ասել է Լիթլը:
Նախօրեին ԱՄՆ նախագահ Բարաք Օբաման հայտարարել էր, որ եթե Գաղտնի ծառայության գործակալների դեմ մեղադրանքը հաստատվի, նրանք խիստ պատիժ կկրեն: