Բռնցքամարտի գերծանր քաշային կարգում IBO/WBO/WBA վարկածներով աշխարհի չեմպիոն Վլադիմիր Կլիչկոն չեմպիոնական գոտու համար պայքարը կանցկացնի Թոնի Թոմսոնի դեմ մենամարտում:
Մենամարտը տեղի կունենա հուլիսի 7-ին` շվեյցարական Բեռն քաղաքի ֆուտբոլային մարզադաշտում: Թոնի Թոմսոնը հայտնի է «Վագր» մականվամբ: Նա անցկացրած 38 մենամարտերից հաղթել է 36-ում, որոնցից 24-ը` նոկաուտով:
«Ես շատ երկար եմ սպասել այս մենամարտին: Այդ օրը ես կանեմ այն, ինչ ինձ չհաջողվեց անել 4 տարի առաջ: Ես նոկաուտի կենթարկեմ Կլիչկոյին և կհռչակվեմ աշխարհի չեմպիոն»,- ասել է Թոմսոնը:
«Թոմսոնը ինձ համար կլինի շատ դժվար մրցակից, քանզի նա ձախլիկ է: Նա ունի հիանալի տեխնիկա: Կարծում եմ, որ այդ մենամարտը կլինի իմ կյանքի ամենադժվար մենամարտերից մեկը: Սպասում եմ Բեռնում կայանալիք մենամարտին»,- ասել է Կլիչկոն:
Հիշեցնենք, որ Կլիչկոն և Թոմսոնը մենամարտել են նաև 2008 թվականին: Այդ մենամարտի 11-րդ ռաունդում հաղթեց Կլիչկոն` նոկաուտի ենթարկելով հակառակորդին: