Թուրքական Dünya Bülteni կայքի փոխանցմամբ՝ իրանա-ամերիկյան առևտուրը շարունակվում է՝ չնայած Իրանի նկատմամբ ԱՄՆ-ի սահմանած պատժամիջոցներին:
ԱՄՆ բնակչության բյուրոյի տվյալներով՝ 2011 թվականին Իրանն ԱՄՆ-ից ներկրել է 229 միլիոն դոլարի ապրանք: 2012 թվականին այդ գործընթացը նույնպես շարունակվելու է: Մարտին Իրանը հայտարարեց, որ ցանկանում է ԱՄՆ-ից գնել 120 տոննա ցորեն:
Մյուս կողմից էլ իրանա-ամերիկյան առևտուրը ձեռք է բերել միակողմանի ուղղվածություն: 2011 թվականին ԱՄՆ-ն Իրանից ներկրել է 888,000 դոլարի ապրանք, ինչը հիմնականում վերաբերում է արվեստի գործերին ու հնաոճ իրերին: Մինչդեռ 2010 թվականին այդ ցուցանիշը կազմել է 94 միլիոն դոլար:
2011 թվականին Իրանի ամենամեծ արտահանման շուկաներն են հանդիսացել Չինաստանը, Իրաքը, ԱՄԷ-ն, Հնդկաստանն ու Աֆղանստանը: Իրանական արտահանման 18 և ներկրման 12 տոկոսը բաժին է ընկել Չինաստանին: Իրանի ամենամեծ եվրոպական առևտրային գործընկերը Գերմանիան է, որը, սակայն, գտնվում է 13-րդ հորիզոնականում: