Մոսկվայում անցկացվող ազգային օլիմպիական կոմիտեների համագումարին Քաթարի և Թուրքիայի ներկայացուցիչները 2020 թվականին կայանալիք Օլիմպիական խաղերի համար ներկայացրին իրենց հայտերը:
Քաթարի ներկայացուցիչը հայտնեց, որ Դոհա քաղաքն այս պահին էլ պատրաստ է ընդունել Օլիմպիկան խաղերը: Քաղաքում սպորտային կառույցների 91 տոկոսը պատրաս է մրցաշարին: Այդ կառույցները 2006 թվականի Ասիական խաղերի և 2011 թվականի Արաբական խաղերի համար էին կառուցվել:
Դոհայի հայտը առանձնանում է նրանով, որ երկրի ներկայացուցիչները ցանկանում են օլիմպիկան խաղերից հետո այդ կառույցներում թույլ տալ մարզվել բացառապես կանանց, որպեսզի Արաբական այդ շրջանում ևս զարգանա կանանց սպորտը:
Ի տարբերություն Դոհայի՝ Ստամբուլի հայտը ներկայացնող Թուրքիայի Օլիմպիական կոմիտեի նախագահ Ուգուր Էրդեները շեշտեց այն հանգամանքը, որ Ստամբուլի հայտը ընդունվելու դեպքում առաջին անգամ պատմության ընթացքում Օլիմպիական խաղերը կարող են անցկացվել միանգամից երկու աշխարհամասում՝ Եվրոպայում և Ասիայում:
Ստամբուլի սպորտային կառույցները տեղակայված կլինեն կողք կողքի և կհեշտացնեն բոլոր մարզաձևերի միջև կապը պահպանելու համար ճանապարհը:
Հիշեցնենք, որ 2020 թվականի Օլիմպիկան խաղերի մայրաքաղաքի անվանումը հայտնի կդառնա 2013 թվականին Բուենոս Այրեսում կայանալիք ՄՕԿ-ի 125-րդ համաժողովին: Դոհայից և Ստամբուլից բացի Օլիմպիական մայրաքաղաքի համար կպայքարեն նաև Տոկիոն, Մադրիդն ու Բաքուն: