Վրաստանի Կենտրոնական բանկը որոշել է արտարժութային ավանդների պարտադիր պահուստավորման նորման փետրվարի 17-ից մեծացնել` դարձնելով 15%:
Վերաֆինանսավորման տոկոսադրույքը չի փոխվել` մնալով 7.5%: Նշենք, որ Հայաստանում վերաֆինանսավորման տոկոսադրույքը այս պահին 7.25% է, իսկ արտարժութային ավանդների պարտադիր պահուստավորման նորման` 12%: Վրաստանում 2010 թ. վերջին գնաճը կազմել է 11.2%, որից 9.5 տոկոսային կետը պայմանավորված է եղել սննդամթերքի թանկացմամբ: Որոշ կանխատեսումներով, գնաճի բարձր տեմպերը կշարունակեն պահպանվել նաև այս տարվա առաջին ամիսներին:
Նշենք նաև, որ 2010 թվականի ընթացքում վրացական բանկերը 20%-ով ավելացրել են վարկավորման ծավալները, ընդ որում` հիմնականում ավելացել են լարիով ավանդների ծավալները: Այդ պատճառով էլ Վրաստանի Կենտրոնական բանկը խստացնում է դրամավարկային քաղաքականության պայմանները: Որոշվել է արտարժութային ավանդների պարտադիր պահուստավորման նորման ավելացնել փուլերով` հունվարի 20-ից այն դարձնելով 10%, իսկ փետրվարի 17-ից` 15%: