«Որպես Եվրոպայի խորհրդի Մարդու իրավունքների հանձնակատար` սա Համարբերգի հերթական աշխատանքային այցն էր Հայաստան»,- «Առաջին լրատվական»-ի հետ զրույցում կարծիք հայտնեց ԱԺ եվրաինտեգրման հարցերի մշտական հանձնաժողովի նախագահ, ԲՀԿ պատգամավոր Նաիրա Զոհրաբյանը:
Զոհրաբյանը նշեց, որ ինքը ևս հանդիպել է Համարբերգի հետ. նրա հետաքրքրությունների տիրույթում մասնավորապես մամուլի խնդիրներն էին, մարտի 1-2-ի դեպքերն ուսումնասիրող ԱԺ ժամանակավոր հանձնաժողովի եզրակացության վրա կատարվող բարեփոխումները, ինչպես նաև ավելացել էր նոր մտահոգություն` բանակում կատարված վերջին միջադեպերը:
«Իր ասուլիսում Համարբերգի տված գնահատականները, ըստ էության, առանձնապես չէին տարբերվում նախորդներից: Իհարկե, որոշ առումներով անպատժելիության մթնոլորտի հետ կապված գնահատականների հետ ես համաձայն չեմ, բայց մի շարք ոլորտներում ռադիկալ ռեֆորմներ կատարելու վերաբերյալ գնահատականները տրվել են նաև մարտի 1-2-ի ժամանակավոր հանձնաժողովում»,- նշեց ԲՀԿ-անդամ պատգամավորը:
Զոհրաբյանը նկատեց, որ որոշակի ոլորտներում բարեփոխումներն արդեն իսկ սկսվել են, մասնավորապես «Երթերի, ցույցերի, հանրահավաքների մասին» օրենքը, «Ընտրական օրենսգրքի» բարեփոխումները, «Ոստիկանության մասին» օրենքը, «Հատուկ միջոցների մասին» օրենքում փոփոխություններ իրականացվեցին, «Հեռուստատեսության և ռադիոյի մասին» օրենքը փոփոխվեց:
«Բարեփոխումները կատարվում են, և ես ցավում եմ, որ Համարբերգի պատասխանը, թե ԵԽ-ն որևէ սանկցիա չի կիրառի, հիասթափեցրել է որոշ քաղաքական ուժերի: Ինձ համար առնվազն տարօրինակ կլիներ, եթե Համարբերգը հանդես գար հայտարարությամբ, թե Հայաստանի նկատմամբ սանկցիա պիտի կիրառվի»,- ասաց Զոհրաբյանը և հավելեց. «Մենք անդամագրվելով ԵԽ-ին` կամավոր ստանձնել ենք խաղի այդ կանոնները և պիտի առաջնորդվենք այն արժեքներով, որոնք ընկած են ԵԽ հիմքում»: