ՀՅԴ պատգամավոր Արտյուշա Շահբազյանը չգիտի՝ ինչո՞ւ է Արարատի մարզում ավշարցիների հետ հանդիպման ժամանակ Սերժ Սարգսյանը կոչ արել ընտրել ՀՅԴ պատգամավորության թեկնածու Արայիկ Գրիգորյանին. Կոնկրետ պատասխան ստանալու համար նա խորհուրդ է տալիս հարցն ուղղել անձամբ Սերժ Սարգսյանին: Այս մասին Շահբազյանն ասաց «Առաջին լրատվական»-ի հետ զրույցում:
«Որևէ ներքին պայմանավորվածություն, չեմ կարծում, որ լինի: Պարզապես այդ մարդիկ այս երկրում կայացած մարդիկ են, տնտեսություն ունեն, հիմնական հարկատուներ են, օրինապահ տնտեսվարողներ են եղել: Նրանք հայտնի մարդիկ են, և հավանաբար դա է դեր խաղացել: Ուրիշ բան չեմ կարող ասել»,- ասաց պատգամավորը:
Հիշեցնենք, որ Սերժ Սարգսյանն Արարատի մարզի Ավշար գյուղում բնակիչների հետ հանդիպման ժամանակ կոչ է արել ընտրել պատգամավորության թեկնածու Արայիկ Գրիգորյանին, ում առաջադրել է ՀՅԴ-ն:
«Տարօրինակ երևույթ մի համարեք: Մենք հանդուրժողականության և քաղաքակիրթ երկխոսության կողմնակից ենք և շատ կարեւոր խնդիրներ փորձում ենք լուծել՝ միավորելով շատերի ջանքերը: Եթե Արայիկը Հանրապետական չէ, դա ոչինչ չի նշանակում»,- հայտարարել էր Սերժ Սարգսյանը: