Եվրոպայի անվտանգության և համագործակցության կազմակերպությունը (ԵԱՀԿ) ողջունում է Բելառուսի նախագահի նախկին թեկնածու Անդրեյ Սաննիկովի ազատարձակումը: Այս մասին նշված է ԵԱՀԿ գործող նախագահ, Իռլանդիայի արտաքին գործերի և առևտրի նախարար Էյմոն Գիլմորին հայտարարության մեջ: Այս մասին տեղեկացնում է «Ռոսբալտը»:
Եվրոպացի քաղաքական գործիչը կոչ է անում Ալեքսանդր Լուկաշենկոյին ազատ արձակել մյուս քաղբանտարկյալներին, որոնք դեռ գտնվում են ճաղերի հետևում:
«Սա հիանալի լուր է Սաննիկովի, նրա ընտանիքի ու ընկերների համար, սակայն ես դեռ անհանգիստ եմ բանտերում մնացած մյուս քաղբանտարկյալների, այդ թվում` նախագահի նախկին թեկնածու Նիկոլայ Ստատկևիչի համար,- ասել է Գիլմորը:- Ես կոչ եմ անում նախագահ Լուկաշենկոյին շարունակել այդ դրական շարժն ու ազատել անազատության մեջ գտնվող ընդդիմադիր մյուս գործիչներին»:
Ավելի վաղ Լեհաստանի իշխանությունները ևս Լուկաշենկոյից պահանջել էին ազատել բոլոր քաղբանտարկյալներին:
Հիշեցնենք, որ Բելառուսում 2010 թ. նախագահական ընտրությունների նախկին թեկնածու Անդրեյ Սաննիկովը «Վիտբա-3» բանտից ազատ է արձակվել ապրիլի 14-ին երկրի նախագահի համաներման շնորհիվ: Հաջորդ օրը ազատվել էր «Եվրոպական Բելառուս» ընդդիմադիր ընկերության ընդդիմադիր կոորդինատոր, Սաննիկովի վստահված անձ Դմիտրի Բոնդարենկոն:
Սաննիկովը դատապարտվել էր 5 տարվա ազատազրկման: Զանգվածային անկարգություններ հրահրելու մեղադրանքով դատապարտվել էր նաախագահի մեկ այլ նախկին թեկնածու` Նիկոլայ Ստատկևիչը: Նա դատապարտվել էր 6 տարվա ազատազրկման:
Ներկայումս անազատության մեջ են 10 բելառուս ընդդիմադիրներ և ակտիվիստներ, որոնց իրավապաշտպանները համարում են քաղբանտարկյալներ: Ձերբակալվածների թվում են նաև 2010 թ. Բելառուսի նախագահական ընտրությունների թեկնածու Նիկոլայ Ստատկևիչը, Բելառուսում չգրանցված «Երիտասարդ ճակատ»-ի առաջնորդ Դմիտրի Դաշկևիչը, «Բելառուսի ազգային ճակատ» կուսակցության ակտիվիստ Սերգեյ Կովալենկոն:
