ԱՄՆ-ի՝ Լատինական Ամերիկայի հանդեպ վարած քաղաքականության հասցեին Համաամերիկյան գագաթնաժողովի ժամանակ սուր քննադատությամբ է հանդես է եկել Վենեսուելայի ԱԳ նախարար Նիկոլաս Մադուրոն: «Ժամանակն է, որ Օբաման հասկանա, որ Լատինական Ամերիկան և կարիբյան պետությունները փոխվել են, այդ իսկ պատճառով ԱՄՆ-ի և Կանադայի իմպերիալիստական և վիրավորական քաղաքականությունը նրանց մեկուսացնում են տարածաշրջանից»,- ասել է Մադուրոն՝ հավելելով, որ «եթե ԱՄՆ–ը շարունակի Կուբայի բլոկադան, ապա ընթացիկ գագաթնաժողովը վերջինը կդառնա»:
Վենեսուելական դիվանագետի կարծիքով՝ ԱՄՆ նախագահ Բարաք Օբաման իր նախորդից` Ջորջ Բուշից ժառանգել է Լատինական Ամերիկայում տեղի ունեցող գործընթացների ցինիկ և խեղաթյուրված ընկալումը:
«Օբաման չգիտի մեր երկրի իրողությունները, իսկ իր օգնականները նրան չեն տեղեկացնում Լատինական Ամերիկայում, մասնավորապես՝ Վենեսուելայում տեղի ունեցող գործընթացների մասին։ Այդ իսկ պատճառով ամերիկյան նախագահը գործում է ցինիկ` խեղաթյուրելով իրականությունը»,- ասել է Մադուրոն։ Նա ֆորումում ներկայացնում է Վենեսուելայի նախագահ Ուգո Չավեսին, ով առողջական խնդիրների պատճառով գագաթնաժողովին չի մասնակցում:
Մադուրոն այս կերպ է մեկնաբանել հոկտեմբերին Վենեսուելայում կայանալիք նախագահական ընտրությունների վերաբերյալ ամերիկյան նախագահի «ազատության և արդարության» մասին արտահայտությունները: