Գորիսում բոլոր տաքսի ծառայությունների ավտոմեքենաները Հանրապետականի տարբերանշանով են: Այս մասին «Առաջին լրատվական»-ին տեղեկացրեց իրավապաշտպան Արթուր Սաքունցը:
Նա նշեց, որ Գորիսում տաքսի ընկերություններին պարտադրել են, որպեսզի Հանրապետական կուսակցության դրոշները փակցրած իրականացնեն իրենց աշխատանքը. ինչպես կառավարական մեքենաները` հատուկ տարբերանշաններով: Ըստ նրա` տաքսի ծառայության տարբերանշանն էլ այս դեպքում Հանրապետական կուսակցության դրոշակն է` «Հավատանք, որ փոխենք» նշանաբանով:
Մեկնաբանելով փաստը`Արթուր Սաքունցն ասաց, որ սա ապացուցում է, որ փաստորեն այս սեկտորն ամբողջովին ենթարկվում է իշխանական քաղաքական կուսակցության պարտադրանքին, ավելին` այն քաղաքացիները, որոնք օգտվում են այդ տաքսի ծառայությունից, նրանք ևս, անկախ իրենց քաղաքական նախասիրություններից, ենթարկվում են այդ պարտադրանքին: «Սա ակնհայտորեն ազատ կամքի արտահայտման և բիզնես սեկտորի վրա ճնշման փաստ է: Նման կերպ միահամուռ միասնությունը եղել է միայն կոմունիստների ժամանակ, որը հանդիսանում է ավտորիտար հասարակարգի ապացույց»,- նկատեց Արթուր Սաքունցը:
