Աշխարհում այսօր գերխնդիր է օդի աղտոտվածության բարձր մակարդակը, որը տարբեր թունավոր արտանետումների՝ ազոտի օքսիդների, ծանր մետաղների, արդյունաբերական փոշու, օզոնային շերտի վնասման, ավտոտրանսպորտի արտանետումների հետևանք է։ Սակայն այս պարագայում ամենաանխուսափելին ու վտանգավորն այն է¸ որ օդի աղտոտվածությունն արդեն չափազանց ծանր ազդեցություն է ունենում մարդկանց առողջության վրա: Առողջապահության համաշխարհային կազմակերպության եվրոպական բյուրոյի տվյալներով՝ մթնոլորտային աղտոտվածության հանդեպ առավել զգայուն են մինչև 6 տարեկան երեխաները, ինչպես նաև 50-ից բարձր տարիք ունեցողները։ Վնասակար նյութերն ընկնում են ոչ միայն շնչուղիներ, այլև արյունատար համակարգ, օրգանիզմի տարբեր հյուսվածքներ՝ նպաստելով այնպիսի հիվանդությունների զարգացմանը, ինչպիսիք են՝ թոքերի քաղցկեղը, ինֆարկտը, բրոնխիտը, ասթման, ալերգիկ հիվանդությունները, նյարդային, իմունային, սիրտանոթային համակարգերի և շնչուղիների ախտահարումը։
Իսկ օդի աղտոտվածության հետևանքով հիվանդությունների ավելացման միտումը նկատվում է ամբողջ աշխարհում, այդ թվում՝ նաև Հայաստանում։ Ու թեև բժիշկներն ու էկոլոգները ահազանգում են, օրենսդիրների կողմից օրենքներ են ընդունվում խնդիրը կարգավորելու համար, սակայն դրանից իրավիճակը չի բարելավվում, հատկապես՝ խոշոր քաղաքներում։ Բնապահպանները նշում են, որ ամեն օր օդի հետ միասին մենք շնչում ենք 1 ճաշի գդալ թունավոր փոշի՝ դառնալով կենդանի ֆիլտր,և արդեն վաղուց ապրում ենք չհայտարարված քիմիական պատերազմի մեջ։