ՀՀԿ նախագահ Սերժ Սարգսյանը Հանրապետական կուսակցության նախընտրական քարոզարշավի շրջանակներում այսօր հանդիպումներ է ունեցել Արաբկիր և Քանաքեռ-Զեյթուն վարչական շրջանների ընտրողների հետ:
Հանրապետական կուսակցության նախագահն արաբկիրցիներին ասել է, որ իր գլխավորած կուսակցությունը հանդես է գալիս ազգային արժեքների, մեր ժողովրդի դարեր ի վեր կուտակած իմաստնության օգտին, բայց և միշտ բաց է արդիականն ու նորը ընդունելու համար: Սերժ Սարգսյանի խոսքով, հենց սա է պատճառը, որ լինելով իշխող կուսակցություն, Հանրապետականն իր ընտրողներին ներկայանում է փոփոխությունների օրակարգով: «Մենք քաղաքական ուժ ենք, որը հեռու է շաբաթը մեկ տեսակետ փոխելու գործելաոճից: Մենք չենք վարանում որոշումներ կայացնել, բայց նաև սխալներն ընդունել գիտենք: Մենք ունենք մեր հասարակությանը հուզող բազմաթիվ խնդիրների լուծման հիմնավոր ծրագրեր, բայց նաև գիտենք լսել և հաշվի նստել հնչող առաջարկների ու քննադատության հետ»,-ասել է ՀՀԿ նախագահը:
Հանրապետական կուսակցությունը, Սերժ Սարգսյանի խոսքով, ընտրողների դատի է ներկայանում փոփոխությունների փաթեթով, որն ընդգրկում է հասարակական հարաբերություններից մինչև տնտեսության ճյուղեր, կրթությունից մինչև սոցիալական պաշտպանվածություն: Կուսակցությունը, նրա ղեկավարի հավաստմամբ, ծրագրում է նոր գերակայություններով առաջ տանել տնտեսությունը և զարգացման արդյունքները հասցնել Հայաստանի յուրաքանչյուր քաղաքացու: «Մենք ծրագրում ենք փոխել կյանքի պայմանները, փոխել հնարավորությունների քարտեզը, փոխել հասարակական տրամադրությունները, փոխել բակը, համայնքը: Մենք ծրագրում ենք փոխել տարիներ ի վեր ամրացած վերաբերմունքը մեր մայրաքաղաքի, մեր Երևանի հանդեպ»,-ասել է Սերժ Սարգսյանը՝ մայրաքաղաքի Արաբկիր համայնքում ներկայացնելով Հանրապետական կուսակցության մոտեցումներն ու ծրագրերը նաև Երևանի՝ յուրաքանչյուր հայի և երևանցու համար սիրելի ու հարազատ քաղաքի և տան վերաբերյալ: ՀՀԿ նախագահն ընդգծել է, որ կուսակցության ծրագրերում Երևանն առաջնային տեղ ունի: «Երևանը նոր շունչ է առնելու, սկսած մեր բակերից, վերջացրած ճարտարապետական ու պատմական նկարագրով:
Սիրելի՛ երևանցիներ,
Երևանում որքան էլ աշխատատեղեր են ստեղծվում, այսօր դեռ բավարար չեն: Բայց մենք խոստանում ենք, որ վարելու ենք այնպիսի տնտեսական քաղաքականություն, որ ոչ միայն մենք, այլև դուք ինքներդ եք կարողանալու աշխատատեղեր ստեղծել` հիմնելով ձեր գործը»,-ասել է Սերժ Սարգսյանը:
Ընտրողների հետ հանդիպման ժամանակ Սերժ Սարգսյանը խոսել է նաև հասարակության բոլոր խավերի համար որակյալ և մատչելի կրթության ապահովման ու բազմաթիվ այլ խնդիրների մասին, որոնց մի մասը նրա հավաստմամբ, ազգովի հնարավոր է եղել հաղթահարել: Սերժ Սարգսյանն ընդգծել է, որ համահայկական միասնությամբ շատ ավելի մեծ գործեր են արվելու. «Տնտեսությունն ենք զարգացնելու և պայքարելու ենք Արցախի ազատությունը միջազգայնորեն ձևակերպելու համար: Պայքարելու ենք հանուն Հայոց ցեղասպանության միջազգային ճանաչման ու դատապարտման: Պայքարելու ենք հակահայ քարոզչության դեմ, որ արդեն անցել է բոլոր սահմանները: Պաշտպանելու ենք Հայաստանի քաղաքացու իրավունքներն ու ազատությունները: Պաշտպանելու ենք նրան իրավաբանորեն և ֆիզիկապես: Պաշտպանելու ենք մեր հայրենակիցների իրավունքներն աշխարհում:
Մենք գործ շատ ունենք անելու: Դրանց մի մասը մոտ են հաջող ավարտին, մի մասն էլ նոր ենք սկսել: Դրանք միայն Հանրապետական կուսակցության գործերը չեն, դրանք համապետական և համազգային կարևորություն ունեն: Մեր ու ձեր գործերն են, որոնց արդյունքն ուղղակիորեն անդրադառնալու է յուրաքանչյուրի կյանքի որակի վրա: Մենք ձեզ կոչ ենք անում հավատալ մեր ուժերին հանուն այդ գործերի:
Հավատա՛նք, որ փոխենք»:
Քանաքեռ-Զեյթուն վարչական շրջանի ընտրողների առջև կառավարող կուսակցության՝ ՀՀԿ-ի նախագահը ներկայացել է վերջին տարիներին տարբեր ոլորտներում իրականացված աշխատանքների հաշվետվությամբ:
Սերժ Սարգսյանն ասել է, թե իր պատկերացմամբ քաղաքական ուժը պետք է լինի ընդհանուր արժեքների շուրջ միավորված համախոհների թիմ, որը լուռումունջ, առանց ավելորդ գովազդի ու աղմուկի հետևողականորեն իր գործն է կատարում: Նա ընդգծել է, որ այդպիսի քաղաքական ուժ է Հանրապետական կուսակցությունը, որը չի խուսափում պատասխանատվությունից, որը համալրում է իր շարքեր եկած երիտասարդների ավյունն ու եռանդը և մեծերի գիտելիքն ու փորձը:
Նախընտրական քարոզարշավի ժամանակ Սերժ Սարգսյանը Քանաքեռ-Զեյթուն համայնքում խոսել է նաև մարդկանց շատ մտահոգող անարդարության խնդրի մասին: ՀՀԿ նախագահի համոզմամբ, մարդիկ պատրաստ են դիմակայել ցանկացած դժվարության, սակայն արդարության պակասը երբեք հանդուժելու պատրաստ չեն: «Անարդարությունը միակ բանն է, որ մարդկանց թևաթափ է անում, կոտրում նրանց սրտերը, հույսն ու հավատը:
Ես ուզում եմ, որ մենք միացնենք մեր ջանքերը և մեր երկրում ամրապնդենք արդարությունը, որպեսզի այն լինի արդարություն յուրաքանչյուրի համար: Մենք պետք է բռնենք պաշտոնական դիրքը չարաշահողների ձեռքը և արդարացի պատժի արժանացնենք յուրաքանչյուր հանցանք: Բոլորդ եք վկա` մենք հենց այդ ճանապարհի վրա ենք:
Ես ուզում եմ, որ մենք միացնենք մեր ջանքերը և ամրապնդենք մեր հավատը վաղվա նկատմամբ: Այդ հավատը սարեր կարող է շրջել»,-ասել է Հանրապետական կուսակցության նախագահը և ևս մեկ անգամ ընդգծել, որ ամեն ինչ հնարավոր է փոխել ու ավելի լավը դարձնել, եթե հավատանք մեր ջանքերին, մեր ուժերին և միասնությանը: Հավատա՛նք, որ փոխենք: