Չինաստանում ավարտվեց «Ֆորմուլա-1»-ի ընթացիկ մրցաշրջանի երրորդ գրան պրիի որակավորման փուլը:
Առաջին որակավորման ժամանակ լավագույն արդյունքը ցույց տվեց Ֆելիպե Մասան («Ֆերրարի»):
Երկրորդ որակավորման փուլում հաղթեց Նիկո Ռոսբերգը («Մերսեդես») և հենց այդ պահին «Մաքլարեն»-ի ներկայացուցիչները սկսեցին դատարկել իրենց բոլիդների վառելիքը, որպեսզի թեթևացնեն նրա քաշը՝ մրցունակ դարձնելու համար: երկրորդ փուլում չորակավորվեցին աշխարհի կրկնակի չեմպիոն Սեբաստիան Ֆետելը («Ռեդ Բուլ») և «Ֆերրարի»-ի 2-րդ համար Ֆելիպե Մասան, որոնք զբաղեցրին համապատասխանաբար 11 և 12-րդ հորիզոնականները:
Երրորդ և ամենակարևոր որակավորման փուլը, որտեղ որոշվելու էր Չինաստանի Գրան պրիի առաջին հորիզոնականից մեկնարկող ավտոարշավորդի անունը, «Մերսեդես»-ը ջախջախիչ ցուցանիշներ գրանցեց, սակայն որակավորման փուլի վերջնամասում Լուիս Հեմիլթոնը («Մաքլարեն») ցույց տվեց երկրորդ արդյունքը՝ հայտվելով Նիկո Ռոսբերգի և Միխայել Շումախերի միջև: Շումախերն այլևս չգնաց արագ շրջանի, քանզի Հեմիլթոնը Գրան պրիի ժամանակ տուգանված է 5 հորիզոնականով:
Որակավորման երրորդ փուլ`
1. Նիկո Ռոսբերգ («Մերսեդես») – 1:35.121 րոպե
2. Լուիս Հեմիլթոն («Մաքլարեն») – 1:35.626
3. Միխայել Շումախեր («Մերսեդես») — 1:35.691
4. Կամուի Կոբայասի («Զաուբեր») – 1:35.784.
5. Կիմի Ռայկոնեն («Լոտուս») – 1:35.898
6. Ջենսոն Բատոն («Մաքլարեն») – 1:36.191
7. Մարկ Ուեբեր («Ռեդ Բուլ») – 1:36.290
8. Սերխիո Պերես («Զաուբեր») – 1:36.524
9. Ֆերնանդո Ալոնսո («Ֆերրարի») – 1:36.622
10. Ռոմեն Գրոժան («Լոտուս») – առանց ժամանակ
Այսպիսով, իր մարզական կարիերայում առաջին անգամ Նիկո Ռոսբերգը Գրան պրին կմեկնարկի առաջին հորիզոնականից: Նրա հետ առաջին գծից կմեկնարկի իր թիմակից և աշխարհի 7-ակի չեմպիոն Միխայել Շումախերը: Չինաստանի Գրան պրիի գործող չեմպիոն Լուիս Հեմիլթոնը կմեկնարկի 7-րդ հորիզոնականից, իսկ աշխարհի գործող չեմպիոն Սեբաստիան Ֆետելը՝ 11-րդ հորիզոնականից:
