Արարատի մարզի Ավշար համայնքում ընտրողների հետ հանդիպման ժամանակ ՀՀԿ նախագահ Սերժ Սարգսյանը ընտրողներին կոչ արեց ձայն տալ ՀՅԴ ներկայացուցիչ, թիվ 18 ընտրատարածքում առաջադրված թեկնածու Արայիկ Գրիգորյանին: Նախագահը ներկաներին ասաց, որ չզարմանան։
«Թեև Արայիկ Գրիգորյանը ՀՀԿ անդամ չէ, սակայն կան անկուսակցականներ, որոնք հանրապետականներից շատ ավելին կարող են անել»,- ասաց նա` հավելելով, թե իրենք հանդուրժողականության և քաղաքակիրթ երկխոսության կողմնակից են: Ըստ նախագահի՝ միայն կառավարությունով ոչնչի չեն կարող հասնել, և շատ բան կախված է գյուղապետերից և յուրաքանչյուրից:
Հայանիստ համայնքում Սերժ Սարգսյանը ընտրողներին կոչ արեց ձայն տալ ՀՀԿ թեկնածու, թիվ 16 ընտրատարածքից առաջադրված Մուրադ Մուրադյանին: Նախագահը Հայանիստում ներկաներին խորհուրդ տվեց շատ աշխատել։
«Մի քիչ, ժողովուրդ ջան, եթե աշխատասիրությունը ավելացնենք, էս հողը ձեզ պահելու է, հավատացեք, որ կարող եք այստեղ աշխատել, կյանքը շարունակել, որովհետև ծանր վիճակից արդեն դուրս ենք եկել։ Եթե բոլորս հավատանք, մենք կարող ենք ավելին անել»:
Սերժ Սարգսյանի այցը կեզրափակվի Վեդիում և Արտաշատում ընտրողների հետ հանդիպումով: