«Շատ հետաքրքիր իրավիճակ է՝ կանանց մեկամսյակին խառնվեց ապրիլի 1-ի մեկամսյակը. ով ինչ ասես՝ խոսում է, ով ինչից ասես՝ մտածում է, նույնիսկ այնտեղ են հասել, որ մարդիկ մոռացել են իրենց դիրքերը, ինչ փոխհարաբերություններ են եղել, միայն թե՝ կոտրենք, փշրենք, քննադատենք, ասենք, որ մենք այս խեղճ ու կրակ ժողովրդի հիմնականում ծառաներն ենք, և մեր անձը նորից մի Ավարայրի դաշտ է ստեղծվել, նորից գնում ենք որպես մահապարտներ զոհվելու: Մենք չենք ուզում հակադարձենք, մենք պարզապես ասում ենք այն, ինչ երեկ ենք ասել, ասում ենք այսօր և վաղն ենք ասելու»,- այսօր ԱԺ-ում ճեպազրույցի ճամանակ հայտարարեց ՀՀԿ խմբակցության ղեկավար Գալուստ Սահակյանը:
Նրա կարծիքով՝ միայն ծրագիրը դրոշ դարձնելով հնարավոր չէ ժողովրդի ակտիվությունն ապահովել ընտրությունների ժամանակ:
«Առաջին լրատվական»-ի հարցին՝ ՀՀԿ-ն իր նախորդ ծրագիրը չկարողացավ կատարել, այժմ ինչպե՞ս եք ժողովրդին վստահեցնելու, որ այս անգամ կկատարեք ձեր ծրագիրը, Գ. Սահակյանը պատասխանեց. «Եթե ծրագրեր չեն կատարվել, ուրեմն կոալիցիան չի կարողացել կատարել: Կոալիցիոն քաղաքական ուժերի ծրագիրն է դրվել կառավարության ծրագրի հիմքում, և կոալիցիան այս տարիներին նպատակադրված աշխատել է, որ իրագործի դա: Չկա միայն ՀՀԿ ծրագիր»:
Դիտարկմանը, որ ՀՀԿ նախընտրական խոստումները կոալիցիոն չէին, Գ. Սահակյանը հակադարձեց, որ այդ խոստումների բովանդակությամբ կոալիցիոն քաղաքական ուժերը հաստատել են կառավարության ծրագիրը, որը մատուցվել է ժողովրդին, և 3 քաղաքական ուժեր, առաջին շրջանում՝ նաև ՀՅԴ-ն, փորձել են լուծումներ տալ: Նրա մեկնաբանությամբ՝ քանի որ առջևում ընտրություններ են, քաղաքական ուժերը փորձում են մասնատել և, ըստ ոլորտների, օրինակ՝ քաղաքաշինությունում, առողջապահությունում, ձեռք բերված հաջողությունները ներկայացնել որպես սեփական կուսակցական հաջողություններ: Մինչդեռ, ըստ բանախոսի, այդ ծրագրերը կատարվել են նաև ՀՀԿ դերակատարությամբ: