ՀՀ ապագա խորհրդարանի խնդիրը պետք է լինի օրենքի հավասարության կիրարկում ապահովելը: Քաղաքական և միջազգային հետազոտությունների հայկական կենտրոնի` այսօր կազմակերպած քննարկման ժամանակ այս մասին ասաց թիվ 8 ընտրատարածքում ՀԱԿ-ի կողմից մեծամասնական ընտրակարգով պատգամավորության թեկնածու առաջադրված Վահագն Խաչատրյանը:
«Այսօր, ով խախտումներ անելու հնարավորություն ունի, խախտում է օրենքը: Ոմանք անգամ ճամփեզրին չարտոնված հանրահավաքներ են անում, ՀՀԿ-ն հաճախ ճանապարհներ ու խաչմերուկներ է փակում, բայց ակնհայտ է, որ երբ ՀԱԿ-ն է փորձում նման կերպ վարվել, մի շարք խնդիրների է բախվում: Սա անթույլատրելի է»,- ասաց նա:
Վահագն Խաչատրյանի խոսքով՝ ՀԱԿ-ը պատրաստ է համագործակցել բոլոր այն ուժերի հետ, որոնք շահագրգիռ են երկրում ազատ ու արդար ընտրությունների կայացման հարցում:
«Դրա վկայությունն է հանրային վերահսկողության միասնական շտաբի մասին հայտարարությունը: Ինչպես հայտնի է, այն ստորագրել է նաև կոալիցիայի անդամ ԲՀԿ-ն, որը, փաստորեն, իր այս քայլով հայտ է ներկայացրել, թե ՀՀԿ-ն պատրաստ չէ նորմալ ընտրություններ անցկացնել:
Միաժամանակ, խոսակցություններ կան, թե ՀԱԿ-ը տարբեր ուժերի հետ տարբեր պայմանավորվածություններ ունի, սակայն լուրջ մարդիկ չեն հավատում դրանց: Մենք ուղղակի ձգտում ենք իշխանափոխության. իշխանության գալը մեզ համար գերնպատակ չէ»,- նշեց ընդդիմադիր գործիչը:
ՀԱԿ անդամը ընդգծեց` ընտրակեղծիքներին ու խախտումներին դիմագրավելու համար ինքը տարբեր ուժերի միջև սերտ համագործակցության հեռանկար, հնարավորություն ու ցանկություն է տեսնում: