Թուրքական Dünya Bülteni կայքի փոխանցմամբ՝ Ֆրանսիայի առաջիկա նախագահական ընտրություններում ներկայիս նախագահ Նիկոլա Սարկոզիի մրցակից Ֆրանսուա Հոլանդը ԵՄ-ին Թուրքիայի լիիրավ անդամակցության հարցում չի տարբերվում իր մրցակցից: Հիշեցնենք, որ Սարկոզին Գերմանիայի կանցլեր Անգելա Մերկելի հետ հանդիսանում է ԵՄ-ին Թուրքիայի անդամակցության կատաղի հակառակորդներից:
Հոլանդը «Ֆրանս 2» հեռուստատեսության եթերում խոստացել է, որ եթե ինքը հաղթի ապրիլի 22-ին կայանալիք նախագահական ընտրություններում, ապա իր նախագահության 5 տարիներին Թուրքիան չի անդամակցի ԵՄ-ին: Նա հավելել է, որ թեև Թուրքիան երկար տարիներ է, ինչ իր անդամակցության շուրջ բանակցում է ԵՄ-ի հետ, այնուամենայնիվ որևէ առաջըթնաց չի գրանցվել:
Հոլանդն ընդգծել է, որ իր նախագահության ժամանակ որևէ խոսք անգամ գնալ չի կարող ԵՄ-ին Թուրքիայի անդամակցության մասին:
Հիշեցնենք, որ մոտ մեկ ամիս առաջ Հոլանդը խոստացել էր նախագահ ընտրվելու դեպքում վերստին առաջ քաշել փետրվարի 28-ին Սահմանադրական դատարանի կողմից չեղյալ հայտարարված Հայոց ցեղասպանության հերքումը քրեականացնող օրինագիծը:
Բացի այդ, Հոլանդը հայտարարել էր, որ Թուրքիայի կողմից Հայոց ցեղասպանության պաշտոնական ճանաչումը կվերածի ԵՄ-ին Թուրքիայի անդամակցության ճանապարհին ընկած նախապայմաններից մեկի՝ ընդգծելով, որ մտադիր է պետական օժանդակությամբ 2015 թվականին Փարիզում հիմնել Հայոց ցեղասպանության թանգարան:
