Սևծովյան-Կասպյան տարածաշրջանի քաղաքական և սոցիալական հետազոտությունների հանրային ինստիտուտի պատվերով Exit Poll սոցիոլոգիական և սոցիալական հետազոտությունների կենտրոնի կողմից անցկացված սոցհարցման արդյունքները ցույց են տվել, որ ԱԺ ընտրությունների անցողիկ շեմի առաջին երկու տեղերում ՀՀԿ-ն ու ԲՀԿ-ն են: Այսօր կայացած մամուլի ասուլիսի ժամանակ այս մասին ասաց կենտրոնի տնօրեն Լևոն Անդրեասյանը`միաժամանակ կոռեկտ չհամարելով նախընտրական քարոզարշավի ընթացքում կոնկրետ թվեր հրապարակել:
Նա միայն տեղեկացրեց, որ առաջատար ուժերից մեկը կհավաքի 26,8, մյուսը`23,5 տոկոս:
«Անցողիկ մյուս տեղերում են ՀԱԿ-ը, ՀՅԴ-ն, «Ժառանգությունը»: Իսկ ահա ՕԵԿ-ը, մեր հարցումների համաձայն, նոր գումարման ԱԺ չի անցնի:
Հարցումներին մասնակցել է ավելի քան 2000 մարդ` Երևանից և մարզկենտրոններից: Հարցումն անցկացվել է մարտի 22-ից ապրիլի 7-ն ընկած ժամանակահատվածում:
Հարցաշարը բաղկացած է եղել 37 հարցից:
Հարցման արդյունքում կարողացել ենք պարզաբանել երեք կարևոր դրույթներ` քաղաքական կազմակերպության վարկանիշն այս պահին, ընտրողի՝ ընտրություն կատարելու մոտիվացիան և յուրաքանչյուր ընտրողի սոցիալական կերպարը»,- պարզաբանեց Անդրեասյանը:
Նրա խոսքով՝ հարցումները վկայում են այն մասին, որ ընտրողների մոտ ընտրակաշառքը շարունակում է որոշիչ գործոն մնալ: «ՀՀ հասուն բնակչության մեկ հինգերորդը պատրաստ է ընտրակաշառք վերցնել, իսկ սա նշանակում է, որ նրանք կարող են նույն հաջողությամբ նյութական վարձատրության դիմաց գործիք դառնալ նույնիսկ արտաքին ուժերի ձեռքում` այսպիսով ապակայունացնելով երկրի ներքաղաքական կյանքը: Չկողմնորոշված ընտրողների թիվը ավելի քան 13 տոկոս է:
Հատկանշական է նաև, որ մեր հարցումներին մասնակցած ոչ Առաքելական եկեղեցու՝ աղանդավորական կազմակերպությունների 195 հետևորդները պատրաստվում են քվեարկել առավելապես մեկ քաղաքական ուժի օգտին, սակայն որի` չեմ կարող ասել»:
Ասուլիսի մյուս բանախոս, Exit Poll սոցիոլոգիական և սոցիալական հետազոտությունների կենտրոնի ղեկավար Ռուզան Իսաղուլյանը լրագրողների բազմաթիվ պնդումներից հետո ասաց, որ աղանդների հետևորդները իրենց ձայնը պատրաստվում են տալ ընդդիմադիր կուսակցության: