«Արեւելյան գործընկերության» ծրագրի անդամ պետությունների հետ ԵՄ երկրորդ գագաթնաժողովը նախատեսված է անցկացնել 2011թ. մայիսին:
Ինչպես ԵՄ Խորհրդի մամլո ծառայությունից հաղորդել են РИА НОВОСТИ գործակալությանը, նման որոշում է ընդունվել երկուշաբթի օրը, Լյուքսեմբուրգում կայացած կառույցի 27 անդամ պետությունների ԱԳ նախարարական նիստի ժամանակ:
Հիշեցնենք` «Արեւելյան գործընկերության» հիմնադիր գագաթնաժողովը կայացել է 2009թ. մայիսին Պրահայում: Ծրագիրը միտված է մասնակից երկրների՝ Հայաստանի, Վրաստանի, Ադրբեջանի, Ուկրաինայի, Բելառուսի եւ Մոլդովայի քաղաքական եւ տնտեսական մերձեցմանը Եվրոպական Միությանը: Մինչ 2013 թ.-ը ծրագրի շրջանակներում նախատեսված է տրամադրել 600 մլն եվրո` մասնակից պետությունների պետական ինստիտուտների ամրապնդման, սահմանների վերահսկողության, ինչպես նաեւ փոքր կազմակերպություններին օժանդակության նպատակով:
Կառույցի մամլո ծառայությունից գործակալությանը փոխանցել են, որ «Արեւելյան գործակցության» երկրորդ գագաթնաժողովը կողմերին հնարավորություն կընձեռի ամենաբարձր մակարդակով «վերլուծելու ծրագրի իրականացման առաջընթացն ու նախանշելու ապագա առաջնահերթությունները»:
Մինչ գագաթնաժողովը՝ 2010թ. նոյեմբերին՝ նախատեսված է գործակցության անդամ պետություների նախարարական հանդիպումը Բրյուսելում: