Հայաստանի գործատուների հանրապետական միությունը նախատեսում է ապրիլի 17-30-ը ընտրարշավին մասնակցող քաղաքական ուժերի հետ քննարկումներ կազմակերպել տնտեսական թեմաներով: Միության նախագահ Գագիկ Մակարյանն «Առաջին լրատվական»-ին հայտնեց, որ պաշտոնական նամակներ են հղել 6 կուսակցությունների՝ ՀՀԿ-ին, ԲՀԿ-ին, ՕԵԿ-ին, «Ժառանգությանը», ՀԱԿ-ին և ՀՅԴ-ին: Հրավեր կհղեն նաև Կոմկուսին:
Քննարկումների համար ընտրված թեմաներից առաջինն է՝ «Երիտասարդության զբաղվածություն, միգրացիա և թրաֆիքինգ», քանի որ, ըստ Գ. Մակարյանի, երիտասարդներն ամենախոցելի և ամենաշատը միգրացիայի դիմող խումբն են: Վերջին ցուցանիշով և գործազրկության առումով աշխարհի համեմատ վիճակը ՀՀ-ում 3 անգամ ավելի վատ է:
Երկրորդ թեման՝ կանանց ձեռնարկատիրությունն է, քանի որ կանայք կրթված են, քանակապես շատ են և նրանց դիրքը ամրապնդելու խնդիր կա: Երրորդ թեման՝ միկրո, փոքր ու միջին ձեռնարկատիրության խթանումն է: Չորրորդը՝ արտահանման խթանման և արդյունաբերության զարգացման խնդիրները, և Գ. Մակարյանի խոսքով՝ կուսակցությունները, որոնք խոսում են սրա մասին, պետք է ցույց տան, թե ինչ մեխանիզմներով և ինչ արագությամբ են պատկերացնում դրա իրագործումը: Վերջին թեման տարածքային համաչափ զարգացումն է:
«Բանավեճը լսելով և քննարկելով՝ կկարողանանք գնահատական տալ, թե քաղաքական որ ուժի ծրագրերն են առավել նախընտրելի ձեռներեցության զարգացման տեսակետից»,- ասաց Գ. Մակարյանը:
