Վախենալով իշխանական ապարատից` խուսափում են շտաբի տարածք տրամադրել, «Առաջին լրատվական»-ի հետ զրույցում ասաց թիվ 33 ընտրատարածքում առաջադրված թեկնածու Շալիկո Զորյանը`խոսելով նախընտրական պայքարի և ծագած խնդիրների շուրջ:
Նա նշեց, որ իր մրցակիցներն ավելի շատ շտաբներ ունեն, իսկ իրեն խուսափում են շտաբի տարածք տրամադրել: «Ըստ երևույթին վախենում են իշխանական ապարատից և նրանց թեկնածուների ազդեցությունից: Ամեն բան իրականացվում է տեղական ինքնակառավարման մարմինների աշխատակիցների`գյուղապետերի, թաղապետերի միջոցով: Նրանք ինչպես միշտ, գաղտնի են գործում»,- նշեց Շ. Զորյանը:
Խոսելով իր քարոզարշավից` նա ասաց, որ բուկլետներ դեռ չունի: «Գյուղական բնակավայրերում ունեցել ենք 6 հանդիպում և շարունակելու ենք, վաղը ևս ունենալու ենք հանդիպումներ: Հիմնականում հանդիպումների համար գյուղերում չկան դահլիճային պայմաններ, դրսում ժողովրդի հետ հանդիպում եմ ինչքան եղանակային պայմանները թույլ են տալիս»,- մանրամասնեց թեկնածուն:
Հիշեցնենք, որ թիվ 33 ընտրատարածքում առաջադրված են նաև ՀՀԿ պատգամավոր Աշոտ Աղաբաբյանը և ՕԵԿ պատգամավոր Հովհաննես Մարգարյանը:
