Մաշտոցի պուրակում պայքարը շարունակական է լինելու, «Առաջին լրատվական»-ի հետ զրույցում նման տեսակետ հայտնեց «Թռչկան» քաղաքացիական նախաձեռնության անդամ, բնապահպան-ակտիվիստ Ռուզաննա Գրիգորյանը`խոսելով Մաշտոցի պուրակում ծավալված հանրային դիմադրության շուրջ:
Նա նշեց, որ քաղաքական ոլորտում խոսակցությունները անդրադարձ չեն ունենա պուրակի պայքարի վրա, քանի որ այն քաղաքական է այնքանով, որքանով իրենք հարցեր են բարձրացնում և ստիպում քաղաքական ուժերին և պատկան մարմիններին այդ հարցերը լուծել: «Այդքանով այս գործընթացը քաղաքական է, բայց մենք քաղաքացիական նախաձեռնություններ ենք, մեր պահանջը հստակ է` հանրային ունեցվածքի պաշտպանություն: Մաշտոցի պուրակում ակտիվությունը, ակցիաները շարունակվելու են այնքան, ինչքան անհրաժեշտություն կլինի, ինչքան պետք է ապամոնտաժման համար: Իսկ մինչ այդ շարունակական պայքար է լինելու»,- մեկնաբանեց Ռուզաննա Գրիգորյանը:
Անդրադառնալով Խզմալյանի կնոջ ՀՀԿ ցուցակում հայտնվելուն և այնուհետև ինքնաբացարկ հայտնելուն` ասաց, որ այն որևէ ազդեցություն չի ունենա պուրակի պայքարի վրա, որովհետև Մաշտոցի պուրակում պայքարը քաղաքացիական պայքար է: «Մենք ոչ ընտրություններին մասնակցում ենք, ոչ էլ կուսակցական ամբիցիաներ ունենք: Խզմալյանի մասնակցությունը պայքարին ապամոնտաժող բրիգադի անդամ լինելով է պայմանավորված, իսկ այդ խմբերը ինքնակազմակերպված խմբեր են»,- նկատեց ակտիվիստը:
