Հանրապետականի օգտին օգտագործվում են իշխանական լծակները: Այսօր «Առաջին լրատվական»-ի հետ զրույցում նման տեսակետ հայտնեց թիվ 16 ընտրատարածքում առաջադրված ՀՀՇ թեկնածու Գևորգ Գևորգյանը`խոսելով իր նախընտրական քարոզարշավի և ստեղծված պայմանների շուրջ:
Նրա խոսքով` հավասար պայմաններ առերես, առերևույթ թվում է, թե կան: Նա նշեց, որ հանրապետական թեկնածուի օգտին օգտագործվում են բոլոր իշխանական լծակները: «Եթե որևէ դպրոցում, մանկապարտեզում, պետական հիմնարկությունում հանդիպում լինի, անպայման առավելություն կունենա հանրապետականը, ես չեմ ունենա: Ես նաև նման հանդիպման հնարավորություն չեմ ունենա: Առերևույթ ասում են, որ կան հավասար պայմաններ: Սակայն դա հավասար պայման չէ: Այստեղ ոչ թե թեկնածուն է աշխատում մարդկանց հետ, այլ իր համար պետական կառույցի աշխատողները աշխատում են` ցուցակագրելով դպրոցականների ծնողներին»,- մեկնաբանեց Գ. Գևորգյանը:
Անդրադառնալով իր քարոզարշավին` նա ասաց, որ այն անցկացնում է կազմակերպելով տնային այցելություններ, ունենում է հանդիպումներ, բայց ոչ առանձնապես մեծ խմբերի հետ: «Ամսի 16-ին հանդիպում է տեղի ունենալու ընտրողների հետ Մասիս քաղաքում՝ ՀԱԿ-ի հետ համատեղ, ղեկավար Լևոն Տեր-Պետրոսյանի մասնակցությամբ»,- եզրափակեց իր խոսքը Գ. Գևորգյանը:
Հիշեցնենք, որ թիվ 16-րդ ընտրատարածքում առաջադրված են նաև ՀՀԿ թեկնածու Մուրադ Մուրադյանը և ԲՀԿ պատգամավոր Տիգրան Ստեփանյանը:
