Սոցիոլոգ Գևորգ Պողոսյանը հիմքեր չունի չվստահելու Gallup International Association-ի՝ մայիսի 6-ին Հայաստանում անցկացնելիք «էքզիտ-փոլի» արդյունքներին: Այս մասին նա ասաց «Առաջին լրատվական»-ի հետ զրույցում:
«Սա շատ լուրջ կազմակերպություն է, և կարծում եմ՝ իրականությանը մոտ թվեր կներկայացնի: Միաժամանակ, Gallup-ն այնքան մեծ հեղինակություն ունի, որ համոզված եմ՝ կաշառքների չի տրվի: Նա չի ցանկանա վարկաբեկվել Հայաստանի նման փոքրիկ երկրում»,- ասաց Գևորգ Պողոսյանը:
Անդրադառնալով այն հանգամանքին, որ կազմակերպությանը սոցհարցում և «էքզիտ-փոլ» անցկացնելու պատվեր տվել է «Արմենիա» հեռուստաընկերությունը, սոցիոլոգը նկատեց, որ արդյունքների վրա դա ոչ մի կերպ չի կարող անդրադառնալ: «Այդ հեռուստաընկերությունը ոչ կուսակցություն է ներկայացնում, ոչ էլ իշխանության որևէ թև»:
Հիշեցնենք, որ «Արմենիա» հեռուստաընկերությունը և Gallup International Association-նն օրերս պայմանագիր են ստորագրել ըստ որի` Gallup սոցիոլոգիական հետազոտությունների կենտրոնը մայիսի 6-ին կայանալիք ԱԺ ընտրությունների առիթով կիրականացնի սոցիոլոգիական հարցում և «էքզիտ-փոլ»: Խորհրդարանական ընտրությունների քարոզարշավի ընթացքում անցկացված հարցման արդյունքները կհրապարակվեն ոչ ուշ, քան մինչև ապրիլի 27-ը: Սոցիոլոգիական հարցումը կիրականացվի Երևանում և Հայաստանի մարզերում, «էքզիտ-փոլը» կիրականացվի մայիսի 6-ին՝ ընտրությունների օրը, պարզելու ընտրական իրավունք ունեցող և ընտրությանը մասնակցած ՀՀ քաղաքացիների քաղաքական նախասիրությունները:
