Մերսին նահանգում կառուցվելիք առաջին ատոմակայանը, որի շինարարությունը պետք է իրականացնի ռուսական կողմը, միակը չի լինի: Թուրքական մամուլում արդեն մի քանի օր է տեղեկություններ են հայտնվում առ այն, որ կկառուցվի ևս մեկ ատոմակայան: Մենք հաղորդել ենք, որ դրա համար հայտ են ներկայացրել կորեական և ճապոնական ընկերություններ: Hurriyetin այսօր տված հարցազրույցում կորեական Ատոմային էներգիայի աջակցության գործակալության նախագահ Ռի Ջաե-Հվանը (Rhee Jae-Hwan) ներկայացնելով իր երկրում միջուկային էներգետիկայի զարգացման պատմությունը, նշել է, որ անհրաժեշտություն կա պրոպագանդել էներգիայի այս տեսակի կարևորությունը, չնայած այն փաստին, որ շատ երկրներում դա դիտվում է որպես վտանգավոր էներգիայի աղբյուր: Օրինակ բերելով Արաբական Միացյալ Էմիրությունները` նա նշել է, որ նույնիսկ այդ երկիրը, որը նավթային պաշարներով 5-րդն է աշխարհում, որոշել է նույնպես ատոմակայան կառուցել: