Հայաստանը մշակաբույսերի, հացահատիկաընդեղենի և մրգերի համար բնակլիմայական պայմաններով նպաստավոր երկիր է, իսկ ցանքսատարածքների պակաս ևս չունի, բայց, չգիտես ինչու, գյուղի բնակիչները չեն օգտագործում դրանք այսօրվա շուկայական պահանջներին համապատասխան, ինչն իր հերթին նպաստում է, որ Հայաստանը որոշ մշակաբույսեր, հացահատիկ և այլն, և այլն ներկրի դրսից։ Գյուղնախարարության բուսաբուծության վարչության պետ Գագիկ Մանուչարյանից հետաքրքրվեցինք՝ գյուղի բնակիչների հետ աշխատանքներ տարվում են, թե այսօր շուկան ի՞նչ պահանջարկ ունի, որ տվյալ արտադրանքի մշակությամբ զբաղվեն, որը հետագայում կարելի է նաև զարգացնել ու արտահանել դրսի շուկա։ Մեզ հետ զրույցում նա ասաց, որ բոլոր համայնքներում գյուղնախարարությունը ունի գյուղատնտեսության աջակցության մարզային կենտրոններ։ «Այդ կենտրոնների աշխատակիցները ամրացված են համայնքներին։ Այնպիսի համայնք չկա, որ ներկայացուցիչ չլինի։ Եթե գյուղացուն որևէ բան հետաքրքրում է, նրանք պարտավոր են պատասխանել տրված հարցերին և կոչված են հենց դրա համար»,- ասաց Գագիկ Մանուչարյանը և ավելացրեց, որ այդ կենտրոնները բավականին երկար ժամանակ է՝ գործում են։ Այնինչ, գյուղի բնակիչները մեզ հետ զրույցում ասացին, որ նույնիսկ տեղեկացված չեն դրա մասին, քանի որ, եթե տեղյակ լինեին, ապա իրենց հարցերով կդիմեին նրանց, և գուցե այսօր իրենց վիճակը փոքրիշատե բարելավվեր։ Միաժամանակ խոստացան հետաքրքրվել և պարզել, թե տվյալ կենտրոնը իրականում գործում է, թե միայն թղթի վրա գոյություն ունի։