Սուդանի կառավարությունը հարավսուդանական զորքերին մեղադրել է իր տարածք ներխուժելու և Հելիգի նավթահանքերի վրա հարձակում իրականացնելու մեջ:
Ինչպես հաղորդում է Xinhua գործակալությունը, պաշտոնական Խարտումի հայտարարության մեջ ասվում է, որ Սուդանի Ժողովրդա-ազատագրական բանակի ստորաբաժանումները, որոնք բաղկացած են Հարավային Սուդանի կառավարական զորքերի ստորաբաժանումներից, վարձկաններից և սուդանցի ապստամբներից, հատել են պետական սահմանը և հարված հասցրել Հելիգի նավթահանքերին:
Հայտարարության մեջ նշվում է, որ Սուդանը «պատրաստվում է կիրառել բոլոր օրինական մեթոդները և միջոցները ագրեսորին կանգնեցնելու համար»:
Մինչդեռ Հարավային Սուդանի հաղորդագրության համաձայն՝ հենց Սուդանի զորքերն են հատել սահմանը և օդային ու ցամաքային հարվածներ հասցրել Հարավային Սուդանին, որի բանակն էլ ստիպված է եղել պատասխանն տալ:
Խարտումը և Ջուբան վերջին մի քանի ամիսների ընթացքում փոխադարձաբար մեղադրում են միմյանց ռազմական սադրանքների մեջ: Փորձագետների կարծիքով՝ երկու երկրների միջև լարվածությունը գնալով աճում է և սպառնում վերածվել բացահայտ հակամարտության:
