Օլիմպիական խաղերի ղեկավարները ուսումնասիրություններ են կատարում`պարզելու համար, թե ինչպիսի յուրահատկություններ ունի կանաչ թեյը։ Ուսումնասիրություններն անհրաժեշտ են դոպինգ-թեստը հնարավոր փոփոխությունների ենթարկելու համար:
Ըստ այդ ուսումնասիրությունների՝ պարզվել է, որ կանաչ թեյը կարող է թաքցնել տեստոսթերոնի բարձր մակարդակը: Սակայն դրանք կատարվել են լաբորատոր պայմաններում, և գիտնականները դեռևս պետք է ստույգ պարզեն, թե ինչպիսին է կանաչ թեյի ազդեցությունը կոնկրետ մարդկանց վրա:
Համաշխարհային հակադոպինգային կոմիտեի գիտական գծով տնօրեն Օլիվյե Ռաբինը հայտնել է, որ ոչ միայն կանաչ թեյը, այլև ոգելից խմիչքները, սննդի որոշակի տեսակներ, մարզումները կամ հիվանդությունները նույնպես կարող են ազդել ախտորոշման վրա:
«Ստիպված ենք որոշակի փոփոխություններ կատարել Օլիմպիական դոպինգ-թեստում: Սխալներից խուսափելու համար պետք է բարձրացնենք տեստոսթերոնի թույլատրելի շեմը: Միայն շատ հիմար մարզիկը կարող է ենթադրել, որ ընդունելով դոպինգ, խմելով կանաչ թեյ՝ կանցնի թեստը: Անձամբ ես խորհուրդ չէի տա վարվել այդպես»,- հայտարարել է տնօրենը:
Ռաբինը նաև նշել է, որ այժմ մեզի հետազոտության փոխարեն հնարավոր է՝ արյան հետազոտություն կատարվի, ինչը թույլ կտա առավել ճշգրիտ որոշել մրցումներին մարզիկների մասնակցության հարցը:
