Նախագահ Սերժ Սարգսյանը Ծաղկաձորում ԵՊՀ ուսանողների հետ կայացած հանդիպումը կարևորեց այնքանով, որքանով այն տեղի է ունենում նախընտրական շրջանում: «Ուզում եմ, որ այսօր քննարկում-բանավեճ լինի: Չեմ եկել քարոզչություն իրականացնելու, որովհետև վստահ եմ՝ ԵՊՀ ուսանողական և դասախոսական կազմը միշտ եղել է ՀՀԿ-ի կողքին»:
Պատասխանելով հարցին՝ ինչի՞ն պետք է հավատանք և ի՞նչը պետք է փոխենք, Սերժ Սարգսյանն ասաց՝ առաջին հերթին պետք է հավատանք մեզ, ընտրություններին, բուհին, այն ամենին, ինչը որ լավ է: Նա նաև շեշտեց, որ նախընտրական ոչ բոլոր խոստումներին է պետք հավատալ:
Սերժ Սարգսյանը առաջիկա խորհրդարանական ընտրությունները գնահատեց որպես շատ կարևոր քայլ.
«Մենք երբևէ այսպիսի շանս չենք ունեցել, պետք է ամեն ինչ անենք, որ ընտրություններն անցնեն ազատ և արդար»:
Նախագահն ասաց, որ ինքը կարողանում է համատեղել երկրի և կուսակցության նախագահի պաշտոնը, և նշեց, որ տրամաբանականն այն է, որ քաղաքական գործիչը աշխատի կուսակցությունում:
Ըստ նրա՝ իշխանությունը վայելք չէ: Ընտրություններում հաղթող ուժը պետք է կարողանա ճիշտ աշխատել: Ուսանողները նախագահին հարցեր ուղղեցին՝ կապված բանակի, արտագաղթի խնդիրների, ընտրական ցուցակներում առկա կեղծիքների հետ:
Սերժ Սարգսյանը խոսելով բանակի մասին՝ ասաց, որ 2011-ին բանակում ամենաքիչ են զոհերն են գրանցվել, ուղղակի բանակի գործունեությունն այժմ շատ թափանցիկ է, և դրա հետևանքով հակառակ կարծիքն է ձևավորվել:
Ինչ վերաբերում է արտագաղթին, նախագահը նշեց, որ մարդիկ նույն բանվորությունը անում են նաև այլ երկրներում՝ հարազատների և հարևանների աչքից հեռու, ինչպես նաև շատերը գնում են բանակից ազատվելու համար:
Նախագահը նաև անդրադարձավ ընտրացուցակներին և ասաց, որ երկրից բացակայելը մարդկանց ընտրացուցակներից հանելու հիմք չէ: Ընդգրկել ցուցակներում դեռևս չի նշանակում նրանց մասնակից դարձնել ընտրություններին: Ընտրողների ցուցակը տեղադրել ենք նաև համացանցում, որպեսզի խուսափենք անճշտությունից և կեղծիքներից:
