РИА Новости-ի փոխանցմամբ՝ Իրանի և «Վեցյակի» միջև բանակցությունները վերսկսվելու են ապրիլի 14-ին Ստամբուլում: Այս մասին հայտարարել է ԵՄ արտաքին հարաբերությունների և անվտանգության քաղաքականության հարցերով գերագույն հանձնակատար Քեթրին Էշթոնի մամլո քարտուղար Մայքլ Մաննը.
«Մեզ հաջողվել է պայմանավորվածության հասնել ապրիլի 14-ին Ստամբուլում բանակցությունների վերսկսման շուրջ: Հուսով ենք, որ առաջին հանդիպումը հաջողություն կունենա, ինչը կնպաստի հետագայում առաջընթաց գրանցելուն»:
Հիշեցնենք, որ ըստ իրանական լրատվամիջոցների՝ Իրանը նույնպես համաձայն է, որ «Վեցյակի» հետ բանակցություններն անցկացվեն Ստամբուլում: Սակայն Թուրքիայի վարչապետ Ռեջեփ Էրդողանը հայտարարել է, որ դա դեռ հաստատված չէ: Ավելի վաղ Իրանը մերժել էր Նորվեգիայի, Շվեյցարիայի և Ավստրիայի տարբերակները՝ առաջարկելով այդ բանակցություններն անցկացնել Չինաստանում կամ Իրաքում:
