Ամեն տաղավար տոնի հաջորդ օրը համարվում է Մեռելոց: Այդ օրը գերեզմանատուն այցելելու և ննջեցյալներին հիշելու համար է: Արտասահմանում այդ օրը գերեզմանատներում լինում են քահանաներ, ովքեր օրհնում են մեռյալներին: Շատ երկրներում գոյություն ունեն գերեզմանատուն այցելելու պետականորեն որոշված օրեր: Օրինակ՝ Ֆրանսիայում Ամենայն սրբոց տոնը նոյեմբերի 1-ին է. այսօր լրագրողների հետ հանդիպմանը տեղեկացրեց Տեր Տաճատ քահանա Դավիդյանը:
Ըստ նրա՝ ճիշտ չէ հենց տոնի օրն այցելել գերեզմանատուն: «Այդ օրը պետք է հատկացվի միայն տոնին, իսկ հաջորդ օրը մենք կատարում ենք հոգեհանգստի պատարագ, հատուկ թղթերի վրա գրում են ննջեցյալների անունները, որպեսզի պատարագի ընթացքում հիշատակվեն»:
Քահանայի կարծիքով՝ քրիստոնյայի համար մահը ոչ թե սուգ է, այլ կարոտ, և երկար ժամանակ սուգ պահելը նույնիսկ մեղք է համարվում: Եկեղեցին հատուկ կարգով հարգանք է մատուցում ննջեցյալներին: Թաղման ժամանակ հնչող շարականները, որքան էլ զարմանալի է, ունեն ոչ թե տխուր, այլ ուրախ բովանդակություն:
Նա անդրադարձավ նաև նախկինում թաղմանը լացող կանանց, որոնց դրա համար գումար էին վճարում, և ասաց. «Մեր եկեղեցին չի ընդունում նման բաներ»:
