Արտաքին միջամտությունը ներլիբանանյան հակամարտությանը պետք է լինի կառուցողական երկխոսություն ապահովելու համար և չպետք է խանգարի կողմերին համաձայնության գալու: Այս մասին Թուրքիայում հայտարարել է Ռուսաստանի արտաքին գործերի նախարար Սերգեյ Լավրովը, որտեղ նա հանդիպել է Թուրքիայի իր գործընկերոջը: «Լիբանանցիները իրենց բարդ պատմության ողջ ընթացքում մեկ անգամ չեն ապացուցել, որ կարողանում են համաձայնության գալ, եթե նրանց չեն խանգարում: Այդ իսկ պատճառով ցանկացած արտաքին մասնակցություն այս գործընթացին պետք է ուղղված լինի այն բանին, որպեսզի լիբանանյան հասարակության բոլոր խմբերին ուղղեն կառուցողական հուն: Հենց այդպես է գործում Թուրքիան մի շարք այլ երկրների հետ, այդ ուղղությամբ է նաև աշխատում Ռուսաստանը լիբանանյան գործընկերների հետ իրենց շփումներում»,- նշել է Լավրովը:
Իր հերթին Թուրքիայի արտաքին գործերի նախարարն ասել է, որ «Լիբանանը Մերձավոր Արևելքում շատ կարևոր երկիր է և հիմա անցնում է կրիտիկական ժամանակահատվածով»: «Մենք Թուրքիայում ցանկանում ենք, որ Լիբանանի կայունությունը հաստատվի նաև մեր, ինչպես նաև տարածաշրջանային խաղաղության դիրքերից, քանի որ ցանկացած ճգնաժամ, որ կարող է առաջանալ այնտեղ, ազդելու է տարածաշրջանի բոլոր երկրների վրա»,- ասել է Դավութօղլուն: Նա նաև ավելացրել է, որ Թուրքիան «հարգանքով է վերաբերվում այն որոշմանը, որը կկայացնի Լիբանանի կառավարությունը, բայց մենք ցանկանում ենք, որպեսզի նրանք հաշվի առնեն նաև ողջ տարածաշրջանի շահերը, տարածաշրջանի բոլոր երկրների շահերը և չվտանգեն խաղաղությունն ու բարեկամությունը այս տարածաշրջանում»:
Հիշեցնենք, որ Դավութօղլուն և Քաթարի արտգործնախարարն այսօր դադարեցրել իրենց միջնորդական առաքելությունը Լիբանան` քաղաքական գործիչներին մեղադրելով փոխզիջումային ծրագրի նկատմամբ վերապահումներ ներկայացնելու համար:
