Ինչպես մամուլի ասուլիսի ժամանակ հայտնել է Թուրքիայի արտաքին գործերի նախարար Ահմեդ Դավութօղլուն, Թուրքիան հույս ունի Ռուսաստանի հետ վիզային ռեժիմը վերացնել արդեն այս տարվա ընթացքում: Մամուլի ասուլիսին նա ներկայացել էր իր ռուսաստանցի գործընկեր Սերգեյ Լավրովի հետ, որն այսօր ժամանել է Թուրքիա:
Այս մասին գրում է РИА-Новоти գործակալությունը:
Թուրքիայի արտգործնախարարը նշել է, որ վիզային ռեժիմի վերացումը շատ կարևոր է իր երկրի համար, քանի որ ավելի քան 3 մլն զբոսաշրջիկ Ռուսաստանից ամեն տարի այցելում է Թուրքիա: «Ինչպես նաև մեր գործարարները և խոշոր ընկերությունների ներկայացուցիչները կարող են այցելել (ազատ.- 1in.am) Ռուսաստան»,- ավելացրել է Դավութօղլուն:
Լավրովը նույնպես հույս է հայտնել, որ դրա արդյունքում կավելանա զբոսաշրջիկների հոսքը Թուրքիայի և Ռուսաստանի միջև: Նա նաև ավելացրել է, որ Ռուսաստանում այս հարցի հետ կապված բոլոր գործընթացներն ավարտված են, և իրենք սպասում են թուրքական կողմին:
Լավրովը խոսել է նաև տնտեսական համագործակցությունից՝ հայտնելով, որ իրենք նպատակ ունեն ապրանքաշրջանառությունը երկու երկրների միջև մոտ ապագայում հասցնել 100 մլրդ դոլարի:
Ասուլիսի ժամանակ պարզ է դարձել, որ Թուրքիայի վարչապետը գարնանը այցելելու է Ռուսաստան:
