Արդեն 3-րդ օրն է ինչ փողոցային առևտրով զբաղվող մի խումբ երևանցիներ քաղաքապետարանի դիմաց պահանջում են քաղաքապետ Կարեն Կարապետյանից չարգելել իրենց զբաղվել փողոցային առևտրով. «Ո՞վ է այսպիսի բան տեսել, մեր քաղաքապետը գենոցիդ է անում իր ազգի նկատմամբ, մենք ի՞նչ ենք անելու, ո՞վ է պահելու մեր երեխաներին»: Նրանք պահանջում են, որ անձամբ քաղաքապետը իջնի և խոսի իրենց հետ և ոստիկաններով չվախեցնի. «Թող քաղաքապետը տղամարդ գտնվի և իջնի ներքև, մենք ոչ ոքից չենք վախենում, միայն վախենում ենք, որ մեր երեխաները սոված մնան»:
Վրդովված քաղաքացիները չեն հեռանա քաղաքապետարանի շենքի մոտից, մինչ իրենց որևէ պատասխան չտան. «Մնալու ենք այստեղ, չենք գնալու, եթե մեզ թույլ չտան զբաղվել մեր գործով, այլ քայլերի կդիմենք: Մենք ուզում ենք մեր հալալ քրտինքով աշխատել, որպեսզի մեր երեխաները սոված չմնան»:
Քաղաքացիներին մի խումբ ոստիկաններ ոչ միայն թույլ չէին տալիս մոտենալ քաղաքապետարանի շենքին, այլ նաև նկարահանում էին բնակիչներին` երևի քաղաքապետի արխիվի համար:
Քաղաքապետարանից մոտեցավ միայն լրատվական բաժնի ներկայացուցիչը` ասելով, որ առևտրի և սպասարկման վարչության գլխավոր մասնագետը պատրաստ է պատասխանել լրագրողների հարցերին: Հովհաննես Ղալեչյանն ասաց, որ որոշումն ընդունված է և բեկման ենթակա չէ. «Անօրինական բացօթյա առևտրով զբաղվող քաղաքացիներին քաղաքապետարանի կողմից առաջարկվել է այլընտրանքային լուծում: Նրանց առաջարկվել է տեղափոխվել հարակից տարածում եղած շուկաներ, որոնց մի մասի տնօրենների հետ պայմանավորվել ենք, որպեսզի սկզբնական շրջանում որոշակի զեղչային համակարգ կիրառվի նրանց նկատմամբ, մինչև գնորդներն ավելի ակտիվ տեղափոխվեն շուկաներ գնումներ կատարելու»: Ղալեչյանն ավելացրեց, որ առևտրով զբաղվողներին նախապես զգուշացվել է և առաջարկվել տարբերակ, երկխոսություն. «Մենք առաջարկել ենք երկխոսության տարբերակ, բայց դա չի նշանակում, եթե խոսքը փողոցային առևտրի մասին է, ապա երկխոսությունը պետք է փողոցում կայանա: Իրենց հրավիրել ենք զրույցի մեր դիրքորոշումը ներկայացնելու համար: Քաղաքապետարանը հաստատակամ է` այս գործընթացն անշրջելի է, որովհետև եթե մի կողմում բողոքավորների մի խումբ կա, ապա մյուս կողմում հարյուր-հազարավոր երևանցիների աջակցությունը կա, որոնք բազմաթիվ զանգերով իրենց շնորհակալությունն են հայտնում այս գործընթացի վերաբերյալ»:
Առևտրի և ծառայությունների մասին օրենքով հստակ սահմանված է այն ապրանքատեսակների ցանկը, որը թույլատրվում է բացօթյա վաճառքի ձևով իրականացնել. ծաղիկներ, տնկիներ, զովացուցիչ ըմպելիքներ և պաղպաղակ, այս ցանկից դուրս ցանկացած ապրանքատեսակի բացօթյա վաճառքն արգելվում է և տուգանվում.«Վարչական իրավախախտումների վերաբերյալ օրենսգրքի 162 հոդվածով նախատեսված է տուգանք, ոչ սահմանված վայրում առևտուր անելու համար: Պաշտոնական անձանց նկատմամբ 20-30 հազար դրամ, իսկ ֆիզիկական անձանց նկատմամբ` 1000 դրամ»:
